اشتريت عربية جديدة؟ اعرف الأوراق والرسوم المطلوبة لترخيصها لأول مرة في 2026

اشتريت عربية جديدة وعايز ترخصها لأول مرة؟ قبل ما تروح المرور، فيه أوراق وخطوات لازم تجهزها، وكمان التكلفة بتختلف حسب سعة موتور العربية.
أول حاجة هتحتاج بطاقة رقم قومي سارية، وفاتورة شراء معتمدة من الوكيل أو المعرض، ومستند الإفراج الجمركي لو العربية مستوردة، بالإضافة لملف الترخيص من وحدة المرور التابعة لمحل إقامتك.
بعد كده العربية بتدخل الفحص الفني للتأكد من رقم الموتور والشاسيه ومطابقتهم للأوراق، ولازم تستوفي مستلزمات السلامة، زي طفاية الحريق والمثلث العاكس وحقيبة الإسعافات الأولية.
وبالنسبة للرسوم والضريبة الأساسية التقديرية، العربيات الأقل من 1330 سي سي بتتراوح بين 800 و1000 جنيه، أما من 1330 لحد 1600 سي سي، فالتكلفة بتتراوح بين 1100 و1500 جنيه.
وخلي بالك، دي مش التكلفة النهائية؛ لأن فيه تأمين إجباري وملصق إلكتروني ورسوم إضافية، وبتتحدد القيمة النهائية داخل المرور حسب حالة العربية والمستحقات المقررة.