15.5 مليار دولار في سنة واحدة.. مصر تتصدر إفريقيا في سباق جذب الاستثمارات الأجنبية!
15.5 مليار دولار في سنة واحدة.. مصر تتصدر إفريقيا في جذب الاستثمارات الأجنبية، وتستحوذ على أكتر من خُمس استثمارات القارة بالكامل!
الأرقام دي مش مجرد تدفقات استثمارية عادية.. دي بتكشف حجم الأموال اللي اتجهت للسوق المصرية خلال 2025.
بحسب وزير الاستثمار والتجارة الخارجية، مصر حافظت على المركز الأول إفريقيًا في جذب الاستثمار الأجنبي المباشر، بتدفقات وصلت إلى 15.5 مليار دولار، من إجمالي 70 مليار دولار دخلت القارة الإفريقية، يعني مصر استحوذت على حوالي 22% من إجمالي الاستثمارات.
والقفزة مش في حجم الأموال بس.. لكن كمان في ترتيب مصر عالميًا، اللي وصل للمركز الـ25 على خريطة الدول الأكثر جذبًا للاستثمار الأجنبي.
وفي مؤشر تاني بيكشف حجم التحول، مشروعات الاستثمار الجديدة، المعروفة باسم Greenfield، قفزت قيمة المشروعات المعلنة فيها من 112 مليار دولار خلال الفترة من 2016 لـ2020، إلى حوالي 227 مليار دولار خلال الفترة من 2021 لـ2025.
والقفزة دي رفعت ترتيب مصر عالميًا في المؤشر من المركز العاشر إلى المركز السادس.
والحكومة بتراهن على استمرار جذب الاستثمارات من خلال تسهيل التراخيص والتصاريح، وتسريع التحول الرقمي، وتطوير الإجراءات الضريبية والجمركية، وتهيئة بيئة أكثر جذبًا للمستثمرين.
يعني مصر مش بس بتنافس على استثمارات المنطقة.. لكنها بتستحوذ على نصيب كبير من تدفقات القارة، وبتتحرك لتعزيز موقعها على خريطة الاستثمار العالمي.