خطوات تحويل عدادك الكودي.. الأوراق المطلوبة للتحويل الرسمي

ملف العدادات الكودية رجع يتصدر اهتمام ناس كتير الفترة دي، خصوصًا مع تحركات الدولة لتقنين أوضاع الكهرباء وتنظيم التعاقدات بشكل رسمي. 
العداد الكودي بيعتبر حل مؤقت للوحدات المخالفة أو غير المقننة، لكنه ما بيديش للمشترك وضع قانوني كامل، وعلشان كده ناس كتير بدأت تدور على طريقة تحويله لعداد قانوني.
الإجراءات بتبدأ بتقديم طلب رسمي لشركة الكهرباء التابع ليها العقار، مع تجهيز مجموعة أوراق مهمة، أبرزها بطاقة الرقم القومي، وعقد ملكية أو إيجار موثق، وخطاب من الحي، وإيصال شحن حديث، وكمان مستند التصالح أو نموذج عشرة لإثبات قانونية المبنى.
بعد كده الشركة بتعمل معاينة فنية للتأكد من سلامة التوصيلات وعدم وجود مخالفات، وبعد استيفاء الشروط بيتحرر عقد جديد باسم المنتفع ويتحول العداد لقانوني.
الأهم كمان أن العداد القانوني بيحاسب بنظام الشرائح، وده ممكن يقلل قيمة الفاتورة مقارنة بالعداد الكودي اللي ليه سعر موحد أعلى.