لو نفسك تشتري عربية.. قانون لإعفاء السيارات من الجمارك والضرائب

يا ترى إيه حكاية القانون اللى بيناقشه البرلمان قانون لإعفاء السيارات من الجمارك والضرائب؟ ومين اللى هيستفيد من تطبيقه ؟ وازاي ممكن يوفر آلاف فرص العمل للشباب ويخفف عنهم تكلفة امتلاك السيارات؟.

لجنة الخطة والموازنة بمجلس النواب وافقت من حيث المبدأ على مشروع قانون جديد يخص سيارات المشروع القومي لتشغيل الشباب اللي بينفذه صندوق تحيا مصر.. والخطوة دي هدفها تقليل الأعباء المالية على المستفيدين وتسهيل بداية مشروعاتهم.

المشروع بيستهدف توفير 3 آلاف سيارة تاكسي تعمل بالغاز الطبيعي و1000 سيارة ربع نقل.. والأهم إن الخزانة العامة للدولة هتتحمل الضرائب والرسوم المستحقة على العربيات وأجزائها المستوردة.. ومنها الجمارك والقيمة المضافة وضريبة الجدول والدمغة ورسم تنمية الموارد المالية للدولة.

وبحسب عضو لجنة الخطة والموازنة ممدوح جاب الله.. الدولة بتدعم المبادرة بمليار جنيه.. بهدف تخفيف التكلفة على الشباب ومساعدتهم في سداد الأقساط وتحقيق دخل من خلال مشروعات صغيرة.

لكن الاستفادة مش مفتوحة للجميع.. فيه شروط لازم تتوافر في المتقدم.. عمره يكون من 25 لـ50 سنة.. حاصل على مؤهل متوسط على الأقل.. معاه رخصة قيادة مهنية درجة تانية.. وأدى الخدمة العسكرية أو حصل على إعفاء منها.. ومايكونش عنده أي مصدر دخل.

وفيه كمان شرط مهم.. المستفيد ممنوع يبيع العربية أو يتصرف فيها أو يستخدمها في غير الغرض المخصص لها لمدة 7 سنوات.. أو لحين انتهاء الأقساط أيهما أبعد.. وإلا يسقط حقه في الاستفادة ويلتزم برد السيارة لصندوق تحيا مصر.

المشروع لسه في مرحلة الموافقة المبدئية على القانون.. يعني مش معناه إن باب التقديم اتفتح بالفعل.. لكن لو اكتملت الإجراءات هتبقى المبادرة واحدة من أدوات دعم الشباب وتحويل السيارات لفرص عمل ومصدر دخل.