قبل ما تشتري في الجمعة البيضاء.. 7 نصايح تحمي فلوسك من العروض المضللة

الجمعة البيضاء قربت، ومعاها عروض وتخفيضات على الأجهزة الكهربائية والموبايلات والملابس وكل احتياجات البيت.. لكن قبل ما تجري تشتري، لازم تاخد بالك من شوية تفاصيل عشان متدفعش فلوسك في خصم وهمي!
أول حاجة، حدد إنت محتاج تشتري إيه، واعمل قائمة واضحة بميزانية متتخطاهاش مهما كانت الإعلانات مغرية.
تاني حاجة، متعتمدش على نسبة الخصم المكتوبة، وقارن سعر المنتج في أكتر من متجر، وشوف سعره قبل العرض وبعده.
كمان اتأكد من مواصفات المنتج والضمان وتكاليف الشحن والتركيب، واتعامل مع متاجر ومنصات موثوقة، وابعد عن الصفحات المجهولة.
وخلي بالك، من حقك ترجع أو تستبدل السلعة خلال 14 يومًا من استلامها وفقًا للاستثناءات القانونية، ولو السلعة فيها عيب، المدة بتوصل لـ30 يومًا.
واحتفظ بالفاتورة، ولو اتعرضت لمخالفة تقدر تتواصل مع جهاز حماية المستهلك على الخط الساخن 19588.
وافتكر دايمًا، مش كل تخفيض فرصة.. الشطارة إنك تشتري اللي محتاجه بالسعر الحقيقي!