"أنا مش متربية تربيتك".. نجلاء بدر تهاجم منتقديها برسالة نارية

كشفت الفنانة نجلاء بدر عن رد فعل زوجها تجاه الانتقادات اللي بتتعرض لها على مواقع التواصل الاجتماعي، مؤكدة إنه اتفاجئ جدًا بحجم التعليقات السلبية اللي بتتكتب على بعض صورها، خاصة إن طبيعة حياتهم مختلفة عن نظرة بعض الناس للأمور.

تصريحات نجلاء بدر 

وقالت نجلاء بدر، خلال لقائها في برنامج في السر مع الإعلامي هشام السيوفي، إن زوجها في الأساس مش من الناس اللي بتستخدم السوشيال ميديا، لكن لما شاف بعض التعليقات اتصدم من طريقة تفكير البعض، وقالت: جوزي مالوش في السوشيال ميديا، ولما شاف بعض الكومنتات اتخض من رد فعل الناس، لأن في حاجات بالنسبة لينا عادي، وبالنسبة لناس تانية مش عادي.

وأوضحت نجلاء بدر إنها ترفض تمامًا إن أي شخص يحكم عليها أو يقيمها بناءً على خلفيته أو طريقة تربيته، مضيفة: أنا مش متربية تربيتك، ولا ثقافتي ثقافتك، ولا تعليمي تعليمك، ولا بنخرج في نفس الشارع، فمتقيمنيش على حسباتك، ولا أنا هقيمك على حسباتي.

الحياة الشخصية لـ نجلاء بدر 

وأكدت أن أسلوب حياتها بيعبر عن البيئة اللي اتربت فيها والتجارب اللي عاشتها، موضحة: أنا بسهر وده مجتمعي وثقافتي، وسافرت وعيشت لوحدي بره مصر، وقعدت سنين بشتغل لوحدي.

ختام تصريحات نجلاء بدر 

واختتمت نجلاء بدر حديثها بالتأكيد على أن اختلاف الأفكار والعادات بين الناس شيء طبيعي، مشيرة إلى أن لكل شخص قناعاته الخاصة، وقالت: في ناس بيقولوا لا بنتي متسافرش بره، موفقاك، بس متفرضش عليا قرارك، لأني متربتش على أفكارك، وأنا مش صغيرة عشان أسمع لآراء حد، وإحنا مختلفين.