دهب مصر يهز الأسواق العالمية.. ارتفاع في الصادرات بنسبة 882% وكلمة السر الإمارات؟
قطاع الدهب في مصر بيشهد قفزة تاريخية وغير مسبوقة.. في حوالي شهرين بس، ارتفعت أرقام الصادرات المصرية بقوة، وسجلت نمو مذهل بتسع أضعاف!
الارتفاع الضخم ده بيطرح تساؤلات بخصوص الأسباب اللي ورا الأداء الاستثنائي.. وإذا كان ده بيمثل تحول استراتيجي في خريطة الصادرات المصرية ولا مجرد وميض مؤقت في ظل التحديات الاقتصادية اللي بنعيشها في الوقت الحالي؟
والسؤال المهم: هل ينجح الدهب في إنقاذ ميزان المدفوعات المصري؟ وإيه هي القطاعات التانية اللي ممكن تمشي على خط الدهب وتحقق انتعاش اقتصادي شامل؟ كل ده وأكتر هنعرف إجابته في "التفصيلة".
في الفترة الأخيرة عاصرت صادرات مصر من الدهب طفرة هايلة خلال أول شهرين من 2025، وده لما ارتفعت بنسبة 882 في المية، عشان تسجل 2.08 مليار دولار، مقارنة بـ 212 مليون دولار بس خلال الفترة نفسها السنة اللي فاتت 2024.
والتطور ده بيعكس النمو الكبير في صادرات الدهب وأهميته في تحسين الميزان التجاري المصري، وده ظهر لما قيمة الصادرات خلال شهرين يناير وفبراير اللي فاتوا عادلت إجمالي قيمة صادرات الدهب خلال أول تسع شهور من سنة 2024.
كمان أن القيمة دي بتمثل نسبة كبيرة توصل لحوالي 63 في المية من إجمالي قيمة صادرات القطاع خلال السنة اللي فاتت بالكامل، وده بيشير إلى أن الدهب بقى في الوقت الحالي من أهم مصادر العملة الصعبة لمصر.
وده اللي وضحته البيانات الحكومية عن النمو الملحوظ في حجم مشتريات دولة الإمارات العربية المتحدة من الدهب المصري خلال شهرين يناير وفبراير اللي فاتوا.
وده لما زادت قيمة واردات الإمارات من الدهب المصري إلى 1.85 مليار دولار، ويعتبر ده نمو مذهل بنسبة 2768 في المية مقارنة بـ 65 مليون دولار بس في نفس الفترة السنة اللي فاتت.
والارتفاع الكبير في الطلب الإماراتي على الدهب المصري بيدي إشارة لتحول في هيكل الصادرات المصرية من الدهب، وده من حيث إن قيمة واردات الإمارات لوحدها في أول شهرين من السنة دي بتقرب بشكل كبير من إجمالي قيمة الدهب المصري اللي استوردته الإمارات على مدار سنة 2024 كلها.. وده معناه إن السوق الإماراتي بقا اعتماده بشكل كبير على الدهب المصري.
ومش بس الإمارات اللي وارداتها زادت ده كمان في زيادة ملحوظة في واردات سويسرا من الدهب المصري بنسبة 48 في المية خلال يناير وفبراير اللي فاتوا، عشان توصل لـ 145 مليون دولار، مقارنة بالفترة نفسها من سنة 2024.
وعلى الرغم من تنوع الدول المستوردة للدهب المصري خلال يناير وفبراير اللي فاتوا واللي وصلوا لـ 26 دولة، إلا أن التوزيع كان شديد التركز، وده لأن الإمارات وسويسرا مع بعض استحوذوا على 99.4 في المية من إجمالي قيمة الصادرات، بواقع 89 في المية للإمارات و10 في المية لسويسرا، وده يوضح الاعتماد الكبير على الأسواق دي.
وبتضم قايمة الدول الأعلى من حيث استيراد الدهب المصري.. الجمهورية التركية واللي جت في المركز التالت بعد الإمارات وسويسرا بقيمة واردات 6 مليون دولار، وكندا بقيمة 1.7 مليون دولار، ولبنان بقيمة 1.4 مليون دولار.
وبالمناسبة.. رئيس قسم التحليل بشركة جولد إيرا المصرية، أسامة زرعي، قال إن من العوامل اللي زودت صادرات الدهب المصري حاجتين، أولهم ارتفاع أسعار الدهب العالمية خلال الربع الأول من 2025، وتاني حاجة هي هدوء الطلب عليه في السوق المحلي.
وقال إن صادرات الدهب وفرت بشكل كبير عوائد دولارية لمصر خلال الربع الأول من السنة دي.