تشكيل إجرامي لسرقة الحسابات البنكية.. شوف آخر حيلة
تخيل تفتح فيسبوك تلاقي إعلان بيقولك: فعّل التحويل الدولي مجانًا، واستقبل فلوس من غير عمولات، وكمان ليك هدايا مجانية!
العرض شكله مغري، لكن ممكن يكون فخ يخليك تخسر فلوسك في لحظات!
هيئة الرقابة الإدارية كشفت عن ضبط تشكيل إجرامي منظم مكوّن من 15 متهمًا، تخصص في الاحتيال الإلكتروني والاستيلاء على أموال المواطنين عن طريق انتحال صفة موظفين في المؤسسات المصرفية.
القصة بدأت بصفحات إلكترونية مزيفة، بتستخدم أسماء وشعارات بنوك حقيقية، وتنشر إعلانات مضللة على مواقع التواصل الاجتماعي علشان تجذب عملاء البنوك.
وبمجرد ما المواطن يتفاعل مع الصفحة ويشارك بياناته البنكية، أفراد التشكيل بيستغلوا المعلومات دي في الاستيلاء على أمواله.
وبعد عمليات الرصد والمتابعة، تم ضبط المتهمين الـ15، وإحالتهم لنيابة الشؤون الاقتصادية وغسل الأموال، والنيابة قررت حبسهم على ذمة التحقيقات.
والرقابة الإدارية وجهت تحذير مهم: متشاركش بياناتك البنكية مع أي صفحة أو رابط مجهول، ومتعملش معاملاتك المصرفية إلا من خلال القنوات الرسمية للبنك.
خلي بالك.. مش كل إعلان بيقدم لك ميزة مجانية هدفه يفيدك، ممكن يكون وسيلة لسرقة فلوسك!

