عداد الكهرباء بـ3000 جنيه.. والتموين كمان؟.. طلب إحاطة عاجلة بالبرلمان

تدفع 3000 جنيه عشان تغير عداد الكهرباء.. وتتفاجئ بخصومات بأثر رجعي من رصيد الشحن، وممكن كمان تلاقي بطاقتك التموينية اتوقفت!

أزمة جديدة تحت قبة البرلمان، بعدما تقدم النائب أحمد فرغلي بطلب إحاطة بشأن تحميل المواطنين تكاليف استبدال عدادات الكهرباء، وتطبيق نظام محاسبة جديد بأثر رجعي على العدادات الكودية.

النائب كشف إن شركات توزيع الكهرباء بتلزم بعض المواطنين بتغيير العدادات القديمة، وتحميلهم تكلفة العداد الجديد ومصاريف التركيب والمعاينة، اللي ممكن توصل لـ3000 جنيه، رغم إن المواطن مش هو اللي طلب التغيير، ومفيش مخالفة أو تلف ناتج عن سوء استخدام.

لكن المفاجأة مش هنا بس!

أصحاب العدادات الكودية فوجئوا بارتفاع أسعار المحاسبة، وإلغاء نظام الشرائح، وخصم فروق ومديونيات من أرصدة الشحن بأثر رجعي، من غير إخطار مسبق.

والأزمة امتدت كمان لبطاقات التموين، بعد وقف بطاقات عدد من المواطنين استنادًا إلى بيانات مرسلة من وزارة الكهرباء بشأن المسددين لرسوم استهلاك الكهرباء بنظام الممارسة.

النائب طالب الحكومة بتوضيح أسباب تحميل المواطنين الأعباء دي، ومراجعة نظام المحاسبة الجديد، وحماية المواطنين من القرارات اللي بتضاعف أعباء المعيشة.

والسؤال: هل تتحمل شركات الكهرباء تكلفة تحديث عداداتها، ولا المواطن هو اللي هيدفع الفاتورة؟!