مفاجأة في إنتاج الغاز بالصحراء الغربية

هل مصر ممكن تزود إنتاجها من البترول والغاز من الآبار الموجودة بالفعل؟.. وهل التكنولوجيا الجديدة تقدر تطلع ثروات من باطن الأرض كانت لحد دلوقتي صعب استخراجها؟.. وهل حفر 50 بئر جديد يفتح الباب لتقليل فاتورة استيراد الطاقة؟
فاااصل
الحكاية بدأت باتفاق مهم بين الهيئة المصرية العامة للبترول وشركة هاليبرتون العالمية.. الاتفاق بيستهدف إجراء الدراسات اللازمة للإعداد لبرنامج حفر 50 بئر بترولية في مناطق الشركة العامة للبترول خلال 18 شهر..

لكن الجديد هنا مش مجرد حفر آبار زيادة.. إنما الاعتماد على تكنولوجيات حديثة زي الحفر الأفقي والتكسير الهيدروليكي متعدد المراحل.. ودي تقنيات بتسمح بالوصول لطبقات جيولوجية كان استخراج البترول والغاز منها بالطرق التقليدية صعب أو غير مجدي اقتصادياً..

والهدف الأساسي هو استخراج أكبر استفادة ممكنة من المناطق الإنتاجية الموجودة بالفعل.. وفتح مصادر جديدة للإنتاج المحلي من البترول والغاز..

والأهم إن فيه تجربة بدأت بالفعل وبتدي مؤشرات مشجعة.. الشركة العامة للبترول استخدمت تكنولوجيا التكسير الهيدروليكي لأول مرة لإنتاج الغاز من طبقة أبو رواش F في بئر NES-8 بالصحراء الغربية..

والنتيجة إن الإنتاج اقترب من 3 ملايين قدم مكعبة غاز يومياً.. رغم إن الطبقة دي مكانش ممكن إنتاج الغاز منها بالطرق التقليدية بسبب انخفاض نفاذيتها..

وده معناه إن التكنولوجيا الجديدة ممكن تفتح الباب لاستغلال موارد كانت موجودة تحت الأرض لكن صعب الوصول ليها اقتصادياً..

وبالنسبة للمواطن.. زيادة الإنتاج المحلي ممكن تساعد مصر على تقليل الاعتماد على استيراد الطاقة وتخفيف الضغط على العملة الأجنبية.. لكن ده يفضل مرتبط بحجم الإنتاج الفعلي والنتائج اللي هتتحقق على أرض الواقع..