ثروة في أعماق البحر.. «الأقفاص البحرية» تفتح الطريق لمضاعفة إنتاج مصر من الأسماك

ثروة سمكية ضخمة مستخبية في أعماق البحر.. ومصر بتجهز تستغلها بطريقة ممكن تنقل إنتاج الأسماك لمستوى جديد تمامًا

الحكاية اسمها "الأقفاص البحرية".. وهي تقنية بتعتمد على تربية الأسماك داخل أقفاص عائمة في المياه البحرية المفتوحة، بدل ما يقتصر الاستزراع السمكي على المزارع التقليدية.

والميزة هنا إن مصر عندها سواحل طويلة على البحرين المتوسط والأحمر، وده بيفتح مساحات كبيرة للتوسع في إنتاج أنواع أسماك مطلوبة محليًا وعالميًا، زي الدنيس والقاروص واللوت.

والأرقام البحثية مبشرة جدًا.. تجارب الاستزراع بالساحل الشمالي سجلت معدل إعاشة للدنيس وصل لـ87.4%، وإنتاجية بلغت 6.47 كيلو لكل متر مكعب، بينما القاروص سجل معدل إعاشة 86.3% وإنتاجية 5.4 كيلو لكل متر مكعب.

والأهم إن مصر بتنتج حاليًا أكتر من مليوني طن أسماك سنويًا، وبتستهدف الوصول لـ3 ملايين طن خلال السنوات المقبلة.

وكمان التوسع في الأقفاص البحرية ممكن يفتح فرص تصدير أكبر، خصوصًا بعد الموافقة الأوروبية على تصدير منتجات الاستزراع السمكي المصرية لدول الاتحاد الأوروبي، اعتبارًا من 4 نوفمبر 2026.

يعني البحر مش بس ثروة للصيد.. ده كمان ممكن يتحول لمزارع إنتاج عملاقة تدعم الأمن الغذائي، وتزود الصادرات، وتفتح باب جديد للاستثمار في الثروة السمكية المصرية.