الطماطم والبطاطس تشعلان الأسعار.. كيف تتحرك مصر لمنع تكرار الأزمة؟

الطماطم بـ25 جنيه والبطاطس بـ30 جنيه.. خضروات أساسية على كل سفرة مصرية، لكن أسعارها بقت عبء جديد على المواطنين، والسؤال: إزاي مصر تمنع تكرار موجات الغلاء دي كل موسم؟

الحكاية مش مجرد زيادة أسعار، لكن وراها أزمة في منظومة الزراعة نفسها.. بحسب حسين أبو صدام، نقيب عام الفلاحين، ارتفاع الأسعار الحالي مرتبط بتراجع المعروض بعد ما مزارعين كتير قللوا المساحات المزروعة، نتيجة خسائر المواسم السابقة وارتفاع تكاليف الإنتاج.

والأرقام بتكشف حجم الأزمة.. سعر كيلو الطماطم في الحقول وصل لـ14 جنيه، وبيتباع للمستهلك بحوالي 25 جنيه، أما البطاطس فوصلت لـ19 جنيه في الحقول، وبتوصل للمستهلك لـ30 جنيه.

وفي المقابل، تكلفة زراعة الفدان الواحد من الطماطم أو البطاطس وصلت في المتوسط لـ100 ألف جنيه، بإنتاجية حوالي 15 طن للفدان.

طيب إيه الحل عشان الأسعار متفضلش تطلع وتنزل كل سنة؟

المقترحات بتشمل تنظيم المساحات المزروعة حسب احتياجات السوق، وتطبيق الزراعة التعاقدية لضمان تسويق المحصول، وتقليل الحلقات الوسيطة بين المزارع والمستهلك.

وكمان التوسع في منافذ البيع، وتوفير مستلزمات الإنتاج بأسعار مناسبة، وتطوير الإرشاد الزراعي لمساعدة الفلاحين على مواجهة الأمراض والتغيرات المناخية.

والأهم إن احتياجات السوق المحلي تتحدد قبل التوسع في التصدير، بحيث يتوفر المحصول للمواطن بسعر مناسب، وفي نفس الوقت يحقق المزارع عائدًا عادلًا من تعبه.

لأن استقرار أسعار الخضروات مش هييجي بقرار مؤقت، لكنه محتاج منظومة تضمن إن الفلاح يكسب والمستهلك يقدر يشتري.