حسام حسن: واجهنا الأرجنتين بشجاعة.. ولم نلعب بأسلوب دفاعي

تحدث حسام حسن المدير الفني لمنتخب مصر الأول لكرة القدم، عن مشوار الفراعنة في كأس العالم 2026 وذلك في أول حوار عقب العودة لـ أرض الوطن.

وقال حسام حسن في تصريحات مع الإعلامي سيف زاهر عبر قناة أون سبورت: مشكلة هيثم حسن كانت إدارية، وكان في مباراة مكناش واخدين بالنا وكنا ممكن نلاعبه وساعتها كانت هتحصلنا مشكلة، بس الحمد لله خدنا بالنا إن فيه أمور إدارية.

حسام حسن: طلبت من اللاعبين نسيان ميسي والتركيز على الرقم 10

وأضاف: أنا بحب الناس كلها، وهاني أبو ريدة رجل محترم ولديه مميزات كبيرة جدًا وعلاقتنا حب لصالح مصر، ولديه إمكانيات كبيرة وأتمنى يطلّع اللي عنده كله.

وأشار حسام حسن في تصريحاته قائلا: كان فيه حاجات في مباراة الأرجنتين خارجة عن إدارتنا، والأمور دي أثرّت على الأمور الفنية، كان كل شوية يدي إنذارات لـ لاعيبتنا وفاولات عكسية، وأجرينا تغييرات اضطرارية بسبب الإصابات، ومهند لاشين لعب الشوط الثاني متحاملًا على نفسه عقب تعرضه لإصابة في نهاية الشوط الأول.

وأردف: أنا راضِ على ما قدمته، ونزلت حمدي فتحي عشان يقفل نص الملعب مع مروان ومهند لاشين، وكمان نزلت تريزيجيه لمساعدة كريم حافظ، مع نزول عمر مرموش بأوامر دفاعية وهجومية، وطلبت منهم القوة والسرعة بجانب مساندة دفاعية، وبقالي سنتين ونص مع منتخب مصر بدوّر على فرض شخصية منتخب مصر في الملعب أمام أي منافس ولا نعتمد على لاعب واحد.

وأكد حسام حسن في تصريحاته: فيه لاعيبة كان ممكن تتخض لو قولتلهم هنلاعب ميسي عشان كدة قولتلهم اللاعب رقم 10 ومش بحب أقول اسمه عشان أنسيهم هيلعبوا مع مين، ويشيلوا من دماغهم موضوع الرهبة والخوف، أنا بحترم المنتخب اللي قدامي، ولكن مش عايز أعرف مين الفريق اللي قدامي ولا اسم أي لاعب، وهذا ليس تقليلًا من اسم ميسي، ومكنش في دماغي إني أدافع واحنا كسبانين الأرجنتين 2-0.. وسعيت لفرض شخصيتنا في الملعب.

وأفاد: مصطفى شوبير تفوق على نفسه في حاجات كتير وكان لدي ثقة في الأربع حراس مرمى، والشناوي رمز كبير ولكن آن الأوان أن يلعب مصطفى شوبير، وطريقة لعب منتخب مصر مبنية على مصطفى شوبير، وسعيد جدًا بطريقة لعب منتخب مصر تحت قيادتي، لأنها لا تقف على لاعب واحد، ومش ببص لأي نادِ قبل انضمام أي لاعب، وفي مدربين أجانب مش بياخدوا ريسك، ولكني كنت شايف إن لازم يبقا فيه إحلال وتجديد.

واستمر حسام حسن في تصريحاته: حمزة عبد الكريم عنده شخصية ومتزن وإمكانياته وفكرة أكبر مثال، هو عمره صغير، ولكنه ليس لاعبًا صغيرًا، هو مشروع مهاجم متميز وأدواره مهمة وبنيته قوية، ويلعب بالرأس بشكل جيد، وعنده طموح ودخل جوه الفريق واتحب بسرعة.

وأتم تصريحاته: هيبة مصر في كل حاجة رجعت تاني، والوطن العربي كله التف حوالينا من جديد، ونمثل إفريقيا أفضل تمثيل، وكان فيه حاجة معجبتنيش في أول البطولة لما رئيس الاتحاد الأوروبي اعترض على العدد الكبير للكرة الإفريقية في كأس العالم، ولذلك كنت سعيدًا بما قدمته المنتخبات الإفريقية في المونديال.