سامح صفوت: الأزمات تُظهر الناس الأصيلة.. وحسبي الله في كل من تسبب في أذيتي

تحدث الفنان سامح صفوت عن الفترة الصعبة التي مر بها بعد عيد الأضحى، عقب تعرضه لوعكة صحية خلال الأيام الماضية، موضحًا أن المرض كشف له الكثير من الحقائق عن من حوله، وموجها الشكر لكل من سانده وحرص على دعمه في هذه الأزمة.

منشور سامح صفوت 

وكتب الفنان سامح صفوت، عبر حسابه الشخصي بموقع فيسبوك: الحمد لله على الشدة اللي عرفت الواحد مين اللي ظهر وقت التعب ومين اختفى، المرض كان وجع بس نعمة من عند ربنا لازم نشكره عليها وأنه كشف عن الناس الأصيلة اللي دعواتها كانت بتوصل شايلكم في قلبي والله، ولولا الشدة اللي الواحد مر بيها مكنش هيعرف الفرق بين شخصيات في حياته، مين الصاحب أو ابن الناس الأصيل الجدع اللي بجد أو حتى معرفتي حديثة العهد بيه أشكره من كل قلبي، ومين اللي كان بيني وبينه عيش وملح وعشرة سنين طويلة وماعملش بيها وكان صاحب مصلحة.

وتابع صفوت: درس والواحد اتعلمه ومش هيتنسي.. الحمد لله عدت على خير وطالع منها متعلم حاجة جديدة على رأي المثل الإنسان طول ما هو عايش بيفضل يتعلم، واللي متابعيني وجمهوري اللي أنتم بالنسبة لي أهلي وإخواتي وعيلتي الكبيرة بأشكركم من كل قلبي، وأشكر كل حد كتب لي كلمة ودعوة طيبة من قلبه.

وأضاف صفوت: حسيت أني بتعافى بفضل ربنا وقدرته ثم دعواتكم اللي وصلت وحسيت بيها وكانت سند ودعم وحسيت أن الدنيا لسه بخير وفيها ناس صافية ونقية زيكم، ربنا ما يحرمني من محبتكم ويكتب لكم أجر كل دعوة ويحفظكم ويجازيكم كل خير وما يكتب على حد المرض والضيق والشدة.. بس لو جت اعرف إنها هتنضف حياتك، وحسبي الله ونعم الوكيل وفوضت أمري إليه في كل من أذاني في حياتي وكان السبب فيما جرى.