زيت التموين مغشوش.. الحكومة تحسم الجدل!

زيت التموين بقى مغشوش.. الساعات الأخيرة ظهرت اخبار وكلام كتير أن الزيت اللي بيتصرف من منافذ التموين مغشوش 
لكن خليني اقولك أن المركز الإعلامي لمجلس الوزراء طلع كشف حقيقة اللي اتقال  وأكد بعد التواصل مع وزارة التموين إن كل السلع اللي بتتصرف في المجمعات الاستهلاكية وفروع جمعيتي وبقالي التموين آمنة تماماً ومطابقة للمواصفات القياسية والاشتراطات الصحية
واللي يطمنك إن كل السلع دي بتخضع لرقابة صارمة وفحص دقيق من الهيئة القومية لسلامة الغذاء قبل ما توصل للمواطن والهدف هو حماية الصحة العامة وضمان جودة المواد الغذائية المدعمة اللي بتوصل لبيوت المصريين يعني مفيش أي داعي للقلق من جودة الزيت أو غيره من السلع
مش بس كدة ده الوزارة بتنفذ حملات تفتيش دورية ومفاجئة على كل المنافذ عشان تتأكد إن مفيش أي سلع مجهولة المصدر بتتسرب للسوق أو بيتم التلاعب في أسعارها وأي مخالف بيتم اتخاذ إجراءات قانونية رادعة ضده فوراً والرقابة دلوقت بقت مشددة أكتر مع قرب موسم عيد الأضحى المبارك
كمان الحكومة ناشدت المواطنين إنهم ما ينساقوش وراء أي شائعات بتنتشر على السوشيال ميديا وياريت نستقي المعلومات من المصادر الرسمية بس ولو شفت أي مخالفة تموينية في منطقتك تقدر تبلغ عنها فوراً.