بعد نهاية التشغيل المجاني.. أسعار المونوريل تفتح باب الجدل

واضح إن ناس كتير كانت راكبة المونوريل
بمنطق:
“استمتع دلوقتي… ادفع بعدين” !

لكن أول ما التشغيل المجاني خلص
والأسعار الرسمية ظهرت
بدأت التعليقات من نوعية:
“ابقى قابلني لو حد ركبه تاني”

وزارة النقل أعلنت أسعار تذاكر المونوريل
واللي بتبدأ من 20 جنيه
وتوصل لـ80 جنيه للخط كامل من مدينة نصر للعاصمة الإدارية

يعني لو موظف بيركب يوميًا
ذهاب وعودة
ممكن يدفع حوالي 1760 جنيه شهريًا
وده تقريبًا ربع الحد الأدنى للأجور الحالي

حتى الاشتراكات
اللي المفروض تكون أوفر
هتكلّف حوالي 900 جنيه شهريًا

وده خلّى ناس كتير تقارن
بين المونوريل
والمترو
والـLRT

خصوصًا إن تذكرة المترو لعشر محطات
حوالي 12 جنيه فقط
بينما المونوريل لنفس المسافة تقريبًا
يوصل لـ40 جنيه

ومع ارتفاع أسعار البنزين والمواصلات أصلًا
بقى بند النقل
واحد من أكتر الحاجات اللي بتسحب من دخل الأسر المصرية

وفي ناس بدأت تسأل:
هل المونوريل معمول لكل الناس فعلًا؟
ولا هيبقى وسيلة مواصلات “فخمة” لفئة معينة بس؟

وفي المقابل
في مؤيدين للأسعار
شايفين إن المشروع حديث جدًا
وتكلفته ضخمة
وبيوفر وقت ومجهود وتجربة مختلفة عن باقي وسائل النقل

لكن على أرض الواقع
واضح إن أول صدمة للمواطن
ماكنتش سرعة المونوريل…
كانت سعر التذكرة!