حسام حسن عن مواجهة إسبانيا: «احنا مش قليلين.. وطموحي كبير»

تحدث حسام حسن، المدير الفني لمنتخب مصر الأول لكرة القدم، عن مواجهة المنتخب أمام إسبانيا.

ومن المقرر أن يلتقي منتخب مصر مع إسبانيا، في تمام الساعة التاسعة بتوقيت القاهرة، على ملعب إسبانيول.

وقال حسام حسن، في تصريحات قبل المباراة: «أنا عارف إن منتخب إسبانيا هو المُصنف الأول عالميا، لكن كرة القدم مش بتعترف بالكلام ده. عندنا الكورة في مصر مش قليلة، وحتى مشاركتنا في كأس العالم دايمًا حلوة، وشاركنا 4 مرات. وحتى في كأس عالم 90 حققنا نتيجة إيجابية قدام هولندا، ولو حققنا نتيجة إيجابية زي مكسب أو تعادل هيكون شيء مميز، وكرة القدم فيها كل شيء".

وأضاف العميد: "أنا طموحي كبير مع المنتخب المصري، وجاي وأنا عارف إني هلاعب منتخب مُصنَّف أول عالميًا، وهو المرشح الأول لكأس العالم. إحنا برضه منتخبنا قوي وكسب أمم أفريقيا كتير، وعندنا نجوم محترفين كتير زي صلاح ومرموش ومصطفى محمد وعبد المنعم، وانضم لينا الفترة الأخيرة هيثم حسن. أنا هلاعب إسبانيا في وسط ملعبهم ووسط جمهورهم، وكان ممكن نعتذر عن المباراة بسبب ضيق الوقت بين مباراة السعودية وإسبانيا، وخصوصًا إن في سفر كتير. أنا متفائل إننا هنستفاد ونقدم كورة حلوة للجميع".

وتابع: "في مباراة السعودية أنا ولاعيبتي عملنا تجربة جديدة في الملعب، وهنعمل تجربة جديدة كمان قدام إسبانيا بكرة. مكسب السعودية كان مكسب معنوي، وأنا بعود اللعيبة بتاعتي إنهم هيلعبوا مستوى تاني في كأس العالم. عشان كده لعبت السعودية وهلعب إسبانيا، وإن شاء الله نستفاد من مباراة بكرة برضه زي مباراة السعودية".