مياه عذبة بطاقة نووية.. مصر تخطط لمشروع عملاق لتحلية مياه البحر بأقل تكلفة عالميًا
مصر بتجهز لمشروع مختلف في ملف المياه.. المرة دي تحلية مياه البحر هتكون مرتبطة بالطاقة النووية في موقع محطة الضبعة، بالتعاون مع شركة روساتوم الروسية.
وزير الكهرباء محمود عصمت عقد اجتماع مع مسؤولي شركة روساتوم للمرافق الذكية لمتابعة العروض المقدمة ومستجدات تنفيذ المشروع، ومناقشة الحلول الفنية والاقتصادية لإنشاء مجمع متكامل لتحلية مياه البحر.
لكن الفكرة مش مجرد استخدام الطاقة النووية لتشغيل محطات التحلية.. فيه كمان اتجاه لتحقيق أقصى استفادة من نواتج العملية نفسها.
إزاي؟
الوزارة بتدرس استخراج الأملاح والمعادن الناتجة عن تحلية المياه، وتحويلها إلى صناعات ومنتجات ذات قيمة اقتصادية، وده ممكن يساعد في تقليل تكلفة إنتاج المتر المكعب من المياه العذبة.
وفي نفس الوقت، مصر بتبحث مشاركة شركات محلية في تنفيذ المشروع، وتوطين تصنيع المعدات والمكونات المستخدمة في محطات التحلية، بدل الاعتماد الكامل على التكنولوجيا المستوردة.
والخطوة دي بتجمع بين مصدر طاقة نووي ومشروع استراتيجي لتأمين المياه، مع محاولة تحويل نواتج التحلية إلى مصدر دخل وصناعات جديدة.
واللافت إن المشروع لسه في مرحلة استكمال الدراسات والحلول الفنية والاقتصادية، لكن نجاحه ممكن يفتح الباب أمام نموذج مختلف لتحلية مياه البحر في مصر، والاستفادة من قدرات محطة الضبعة في أكثر من اتجاه.