440 مليون دولار من السجاد المصري.. صناعة مصرية تفرش طريقها لأسواق العالم
440 مليون دولار صادرات السجاد المصري في عام واحد.. والرقم ده وضع مصر وسط أكبر 10 دول مصدرة للسجاد وأغطية الأرضيات النسيجية في العالم.
مصر احتلت المركز التاسع عالميًا خلال 2024، متفوقة على بريطانيا اللي سجلت صادرات بنحو 309 ملايين دولار.
والقفزة مش بسيطة.. صادرات السجاد المصري ارتفعت من 359.9 مليون دولار في 2023 إلى 440 مليون دولار في 2024، بنسبة نمو وصلت إلى 22.3%.
لكن مين الدول اللي بتنافس مصر في السوق العالمي؟
الصين في المركز الأول بصادرات بلغت 3.32 مليار دولار، وبعدها تركيا بـ3.18 مليار دولار، ثم الهند بنحو 2.24 مليار دولار.
والصناعة المصرية مش بتعتمد على نوع واحد، فالصادرات بتشمل السجاد المنسوج آليًا والسجاد المعقود والسجاد المصنوع بتقنية التافتينج، إلى جانب أغطية الأرضيات النسيجية.
ومن أبرز الأسماء في الصناعة دي شركة النساجون الشرقيون، اللي ليها حضور كبير في إنتاج السجاد المصري وتصديره للأسواق الخارجية.
ورغم إن الصادرات تراجعت إلى نحو 398 مليون دولار في 2025، فإنها فضلت أعلى من مستويات 2023، وده بيكشف حجم الصناعة المصرية وقدرتها على المنافسة في الأسواق العالمية.

