5 مليارات دولار من التكنولوجيا.. صادرات خدمات الـIT المصرية تسجل قفزة عالمية خلال عام
من 500 مليون دولار لـ5 مليارات دولار.. صادرات خدمات تكنولوجيا المعلومات في مصر حققت قفزة ضخمة خلال سنوات قليلة، والقطاع بقى واحد من مصادر العملة الأجنبية المهمة للاقتصاد المصري.
وزير المالية أحمد كجوك كشف إن صادرات خدمات تكنولوجيا المعلومات ارتفعت لنحو 5 مليارات دولار، مقارنة بـ500 مليون دولار، مع استهداف الوصول إلى 6 مليارات دولار خلال 2026.
والقفزة دي بتيجي بالتزامن مع نمو قطاع الاتصالات وتكنولوجيا المعلومات بنسبة 19.3% خلال العام المالي 2025/2026.
لكن إيه اللي بتصدره مصر بالمليارات دي؟
الموضوع مش أجهزة كمبيوتر وموبايلات زي ما ممكن تتخيل.. مصر بتصدر خدمات برمجية ورقمية، وخدمات تكنولوجيا المعلومات والتعهيد، اللي بتقدمها شركات موجودة في مصر لعملاء ومؤسسات في أسواق العالم.
والميزة إن مصر عندها قاعدة كبيرة من الشباب المؤهل، وتطور في البنية التحتية الرقمية، وكمان موقع جغرافي بيساعدها تكون مركز لخدمة أسواق أوروبا والشرق الأوسط وأفريقيا.
والدولة بتراهن كمان على الذكاء الاصطناعي والتوسع في الخدمات التكنولوجية الأعلى قيمة، لجذب استثمارات جديدة وزيادة قدرة الشركات المصرية على المنافسة عالميًا.
والهدف مش مجرد الوصول لـ6 مليارات دولار، لكن تحويل التكنولوجيا والخدمات الرقمية إلى مصدر أكبر للتصدير وتوفير العملة الصعبة.