2 مليار دولار في 4 أيام و38 مليارًا من المصريين بالخارج.. ماذا يحدث في سوق الدولار بمصر؟
الدولار بيخسر ولا الجنيه لسه تحت الضغط؟ وليه العملة الأمريكية رغم تراجعها لسه فوق 53.70 جنيه؟ وهل مليارات الدولارات اللي دخلت مصر في أيام قليلة ممكن تكون بداية انفراجة جديدة في سوق الصرف؟
الحقيقة إن سوق الدولار في مصر بيشهد تحركات مهمة.. فرغم تراجع العملة الأمريكية خلال تعاملات النهارده الاثنين إلا إنها لسه محافظة على مستويات قياسية مرتفعة فوق 53.70 جنيه في جميع البنوك.
وسجل أعلى سعر للدولار 53.76 جنيه للشراء في بنوك أبوظبي الإسلامي وكريدي أغريكول وأبوظبي الأول.. بينما سجل أقل سعر 53.70 جنيه في عدد من البنوك منها التجاري الدولي والتنمية الصناعية.. ووصل سعره في البنك المركزي إلى 53.72 جنيه للشراء.
لكن التطور الأهم مش في سعر الدولار بس.. وإنما في حجم الأموال اللي بدأت تدخل السوق المصرية.. فخلال 4 أيام فقط من الأسبوع الماضي تجاوزت مشتريات المستثمرين العرب والأجانب من أدوات الدين الحكومية حاجز الملياري دولار.. منها 342.9 مليون دولار في جلسة الخميس وحدها.
وده معناه إن شهية المستثمرين الأجانب للاستثمار في أدوات الدين المصرية لسه موجودة.. وإن التدفقات دي ممكن تدعم المعروض من العملة الأجنبية وتخفف الضغوط على سوق الصرف.. لكنها في نفس الوقت أموال سريعة الحركة وممكن تخرج مع تغير ظروف الأسواق.
وفي المقابل فيه مصادر تانية بتدعم احتياطي النقد الأجنبي.. اللي ارتفع إلى 57.5 مليار دولار بنهاية أكتوبر بزيادة 152 مليون دولار خلال شهر واحد.. وبنمو سنوي وصل إلى 14.8%.
أما المفاجأة الأكبر فجايه من تحويلات المصريين بالخارج.. اللي سجلت نحو 13 مليار دولار خلال أول 3 شهور من العام المالي الحالي بزيادة 20.4%.. ووصلت إلى 38.2 مليار دولار خلال أول 9 شهور من 2026.
يعني قدامنا 3 مصادر مهمة للعملة الصعبة.. استثمارات الأجانب وتحويلات المصريين وارتفاع الاحتياطي.. لكن السؤال الأهم هل التدفقات دي تقدر تخفف الضغط على الدولار وتفتح الطريق لاستقرار الجنيه خلال الفترة الجاية؟

