جريمة تهز زفتى.. طفل في العاشرة ينهي حياة جاره الصغير ويخفي جثمانه!

طفل بيقتل طفل.. والأغرب إن اللي ارتكب الجريمة عنده 10 سنين بس! طفل المفروض إنه لسه في سن البراءة واللعب، لكنه بحسب التحريات ارتكب جريمة صادمة، والأكثر رعبًا إنه حاول يخفي آثارها بعقلية يصعب استيعابها!

الحكاية بدأت في مدينة زفتى بمحافظة الغربية، لما طفل اسمه «محمد ش»، عنده 3 سنين، اختفى فجأة من قدام أسرته.

الأب والأم بدأوا يدوروا عليه في كل مكان، والوقت بيعدي والقلق بيزيد، لحد ما الأجهزة الأمنية بدأت تفحص كاميرات المراقبة وتجمع المعلومات.

لكن المفاجأة كانت إن الاشتباه اتجه لطفل عنده 10 سنين، من جيران محمد الصغير!

التحريات الأولية كشفت إن الطفل استدرج جاره لمكان بعيد، وبعد خلاف حصل بينهم أثناء اللعب، اعتدى عليه باستخدام طوبة، ما أدى لوفاته.

لكن اللي حصل بعد الجريمة كان أكثر صدمة!

بحسب التحريات، الطفل أخفى جثمان محمد تحت كمية من التبن، وبعدها رجع يكمل اللعب مع زملائه بشكل طبيعي، في الوقت اللي كانت فيه أسرة الطفل الصغير بتقلب الدنيا عليه وبتدور على ابنها المفقود.

وبعد تكثيف التحريات، نجحت الأجهزة الأمنية في كشف الحقيقة والعثور على جثمان الطفل.

طفل عمره 3 سنين فقد حياته، وطفل تاني عمره 10 سنين متهم بإنهاء حياته ومحاولة إخفاء جثمانه.

جريمة بتسيب سؤال موجع: إيه اللي ممكن يوصل طفل صغير للدرجة دي من العنف، وإزاي تتحول لحظة لعب إلى مأساة تنهي حياة طفل؟