الجنيه بياخد نفس جديد.. إيه سر عودة مليارات الدولارات للسوق المصري؟

الدولار بدأ يتراجع من جديد بعد ما كان قرب يكسر حاجز الـ56 جنيه.. لكن هل التراجع ده بداية موجة هبوط جديدة؟ وإيه اللي رجّع الأموال الساخنة للسوق المصري بعد خروج مليارات الدولارات؟ وهل ارتفاع الاحتياطي النقدي وتحويلات المصريين بالخارج بقوا كلمة السر في دعم الجنيه؟

اللي بيحصل في سوق الصرف المصري مش مجرد حركة عادية في سعر الدولار.. لكن وراه مجموعة من التطورات المهمة اللي بتكشف عن تحسن في تدفقات النقد الأجنبي.

الدولار سجل تراجع جديد خلال تعاملات الثلاثاء.. لكنه لسه بيتداول فوق مستوى 53 جنيه.. بعدما فقد المكاسب الكبيرة اللي حققها في وقت سابق لما وصل لمستويات قريبة من 56 جنيه.

ومن أبرز التطورات اللي دعمت المشهد رجوع الأموال الساخنة لأدوات الدين الحكومية.. فالمستثمرين العرب والأجانب سجلوا صافي شراء بحوالي 614.6 مليون دولار في السوق الثانوية يوم الاثنين.. كمان المستثمرين الأجانب ضخّوا صافي استثمارات بقيمة 399.9 مليون دولار خلال الأسبوع الماضي.

وده معناه إن جزء من السيولة الأجنبية بدأ يرجع للسوق المصري بعد موجة خروج قوية شهدها الأسبوع قبل الماضي.

وفي نفس الوقت.. احتياطي النقد الأجنبي واصل الارتفاع ووصل إلى 57.5 مليار دولار بنهاية أكتوبر.. بزيادة 152 مليون دولار خلال شهر واحد.. وبنحو 7.43 مليار دولار خلال سنة.

لكن التطور الأهم كمان جاي من تحويلات المصريين بالخارج.. اللي سجلت 33.9 مليار دولار خلال أول 8 شهور من 2026.. بنمو 27.2% مقارنة بنفس الفترة من السنة الماضية.

والأرقام دي بتكشف عن مصادر متعددة لدعم السيولة الدولارية في مصر.. سواء من الاستثمارات الأجنبية أو الاحتياطي أو تحويلات العاملين بالخارج.

لكن مهم نفهم إن رجوع الأموال الساخنة مش ضمان لاستمرار تراجع الدولار.. لأنها استثمارات سريعة الحركة وممكن تتغير مع أي تطورات في الأسواق العالمية.