الحكومة تستهدف توفير 50 مليار جنيه.. إيه اللي هيتغير في المصروفات؟

الحكومة داخلة على خطة جديدة لترشيد المصروفات، والهدف توفير مبلغ ضخم ممكن يوصل لـ50 مليار جنيه
وزير المالية أحمد كجوك أعلن عن حزمة إجراءات استثنائية لإعادة ترتيب أولويات الإنفاق، وتقليل المصروفات اللي ممكن الاستغناء عنها أو تأجيلها.

الخطة هتبدأ من الوزارات والهيئات الحكومية، اللي هيكون عندها مرونة في تطبيق إجراءات الترشيد، مع التركيز على تقليل استهلاك البنزين والكهرباء. كمان الحكومة هتراجع المشروعات اللي لسه مبدأتش تنفيذ، عشان تأجل اللي ممكن يستنى، وتوجه الفلوس للمشروعات والخدمات الأكثر احتياجًا.

كمان التجربة حققت قبل كده وفر بحوالي 7 مليارات جنيه خلال الربع الأخير من العام الماضي، من خلال خفض استهلاك الطاقة.

وفي نفس الوقت، فيه تنسيق بين وزراء المالية والصناعة والكهرباء لمساعدة المصانع على تطوير أنظمة الطاقة، والتكلفة هتتسدد من الوفر اللي هتحققه المصانع نفسها، من غير أعباء مالية فورية عليها.