«كفاية ظلم»| ريهام سعيد تعلق على قرار إيقافها شهرين.. ماذا قالت؟

في أول تعليق لها على قرار منعها من الظهور لمدة شهرين، خرجت الإعلامية ريهام سعيد برسالة حادة عبر حسابها على فيسبوك، ناشدت خلالها الرئيس عبد الفتاح السيسي التدخل، مؤكدة تعرضها لما وصفته بالظلم، ومتسائلة عن أسباب القرار وتأثيره على برنامجها وعملها.

وكتبت ريهام سعيد عبر حسابها على فيسبوك: «ما هذا الظلم؟ لا، هذا ليس ظلمًا عاديًا. لماذا تكرهوني في بلدي؟ بلدي التي أحبها، وأحبها أوي كمان. كفاية ظلم، كفاية. مرة شتمت التخان، وأنا عاملة أكبر حملة لمواجهة السمنة، اتوقفت سنة. عارفين يعني إيه سنة؟ وكل شوية وقف، وقف، وقف، وقف. ليه؟ عايزة أعرف ليه؟ أنا مش بعمل حاجة غير بخدم بلدي وأهل بلدي. مهنيًا مفيش غلطة».

وتابعت: «واحدة شتمتني على قناة تليفزيونية، رايحة جايبة سكرين شوت لحاجة مش على صفحتي، وبتقول إني شتمتها. فرضنا إني رديت الشتيمة، وده أكيد حقي، مع إني ما عملتوش، ولا عندك أي إثبات إني عملته. طب وقفتوني شهر عشرة اللي فات ليه شهرين؟ من غير سبب. أيوه، قالوا لي كده، من غير سبب. تامر أمين غلط في الصعايدة، وقفتوه ٣ شهور، وياسمين استضافت هدير وعملوا لقاء مشين، اتوقفت ٣ شهور. توقفوني شهرين عشان بوست وهمي، وفي الآخر دي خناقة شخصية، أنا ما طلعتش على وسيلة إعلامية».

وأضافت: «دلوقتي جاي يتوقفني، وبتقطع رزقي، وبتضيع برنامجي، وبتضر القناة، عشان على حد قولك أنا رديت في بوست؟ بقى أنت بتتلكك لي. زي ما وقفتني شهر عشرة اللي فات من غير أي سبب. بتعاقبني على إني رديت شتيمتي، مع إنه ما حصلش، وبأكد إنه ما حصلش، توقفني شهرين؟ أنا ما حصلش لي حاجة في البلد دي غير إني اتظلمت وبتظلم. الباشمهندس خالد، هل عفوية واخدة ست عندها ٣ أولاد بتعولهم، وعندها مسؤوليات كتيرة جدًا، جاية تشتكي لك إنها اتشتمت، توقف برنامجها؟ هو أنا غلطت في شغلي؟ لو سميناها خناقة ستات، مع إني ما أعرفهاش ولا عايزة أعرفها، إيه دخل البرنامج؟».

ريهام سعيد: «حضرتك بتضر ليه قناة النهار؟»

وأكملت: «حضرتك بتضر ليه قناة النهار؟ ليه؟ حضرتك وقفتني شهرين السنة اللي فاتت من غير أي سبب، وسألت ليه، قالوا لي: اسكتي، هو كده، وسكت. مش قادرة خلاص، كفاية ظلم، كفاية. مفيش حد في العالم بيعمل كده، ولا الإمارات ولا السعودية ولا أي بلد عربي ولا الأجانب. عشان حد يوقف حد عن أكل عيشه وشغله، دي حاجة كبيرة أوي. إزاي عندكوا سهلة كده؟ وما عملتش ولا حاجة. مصر كلها شاهدة إن البرنامج ملتزم التزام رهيب بالأكواد، ومن أحب البرامج لقلوب المصريين».

وقالت سعيد: «أنا رحت اشتكيت للمجلس، فمدام سميرة الدغيدي، اللي هي عدوتي اللدود، قدمت ورقة مطبوعة مفبركة بتقول إني رديت وشتمت ياسمين على صفحتي كتابة. فين البوست ده؟ محدش شافه غيرها. وحتى لو رديت، وحتى لو شتمت، مع إنه ما حصلش، ده إيه علاقته بمهنيتي؟ إيه علاقته برزقي ورزق أولادي؟ فالمجلس قرر يلغي برنامجي. أنا شايفة إنكوا تقتلوني وتخلصوا مني أحسن، لأنكوا دمرتوا بني آدمة، بدل ما كل شوية وقف، وقف، وقف، وقف من غير أي سبب. ظلم، ظلم، ظلم، وقرار ظالم».

وأضافت: «إلى جمهوري الحبيب، أنا ست مظلومة، وانظلمت كتير وبتظلم. أنا اتبهدلت. اتحبست زي المجرمين ٥٥ يوم، وأنا لسه ابني عنده شهر، لحمة حمرا، من غير أي رحمة وبرضع، وحبستوني من غير ما أعمل حاجة. وليه أتحبس وأنا شخصية عامة ومفيش عليّ حاجة ولا إدانة ولا حكم؟ وطلعت براءة من أول يوم، لأني أصلًا كنت بولد، مش موجودة في الشغل. فنانين اتمسكت بمخدرات، ما قعدتش في الحبس يوم واحد. واتوقفت وحصل لي حاجات ما حصلتش لحد، وأنا عمري ما عملت غير كل خير. أنا لو في أي مكان تاني كنت اتكرمت مليون مرة. يا خسارة يا مصر، زعلانة منك أوي».

«حسبي الله ونعم الوكيل».. رسالة ريهام سعيد لجمهورها

واختتمت: «حسبي الله ونعم الوكيل. ربنا فوق الكل، ربنا فوق الكل، ربنا فوق الكل. قادر على كل شيء. قادر يرجع لي حقي، والله قادر، أقسم بالله قادر، وهتشوفوا. ده افتراء وظلم، وخلاص سكت كتير عشان كنت خايفة على ولادي، عشان ممكن ما أعرفش أشتغل تاني، بس خلاص مش هاسكت. كفاية ظلم لمواطنة مصرية اسمها ريهام سعيد. كفاية».

ريهام سعيد تناشد الرئيس السيسي: «أنقذني من فضلك»

وناشدت الرئيس السيسي قائلة: «سيادة رئيس الجمهورية عبد الفتاح السيسي، أنا تعبت من حملات التشويه والحرب والوقف والسجن بدون أي سبب. أنا ست مصرية بستغيث بيك. أنا انظلمت كتير أوي، كفاية. مش عارفة مين اللي بيعمل معايا كده، مين؟ منعتوني من الشغل، وكل شوية أتوقف. محدش هيبقى عايز يتعامل معايا. طب أعمل إيه؟ عندي ٣ أولاد، وما غلطتش نص غلطة، نص غلطة. بالعكس، عملت حاجات كتير أوي كويسة للبلد والناس، وده واجبي. أنقذني من فضلك. أسيب مصر طيب؟ أروح فين؟ تعبت، تعبت أوي. طب موتوني أحسن، أو أنا ممكن أموت نفسي عشان أخلص. تعبت، تعبت وخلاص. إحساس الظلم ده مميت. أنا من أفضل الإعلاميات في مصر، والمصريين عارفين أنا عملت لهم إيه، عارفين. وفوقهم ربنا عارف وشايف. أنا بختصم كل اللي أخد قرار يأذيني ويأذي عيالي يوم القيامة. رجع لي حقي، يا رب، ويرجع لي حقي يا رب. حسبي الله ونعم الوكيل. يا رب، أنت كبير وعظيم وأقوى من أي حد. يا ودود، يا عزيز، يا غفار، أريهم قدرتك في إنصاف المظلوم. إني مغلوب فانتصر».