مقدرش أتخيل حياتي وأنت مش فيها.. لبلبة تهنئ عادل إمام بعيد ميلاده

احتفلت الفنانة لبلبة بعيد ميلاد الزعيم عادل إمام، والذي يصادف اليوم الأحد 17 مايو، من خلال رسالة مؤثرة عبر مداخلة ببرنامج كلمة أخيرة. 

لبلبة تحتفل بعيد ميلاد عادل إمام 

وقالت لبلبة في مداخلة مع الإعلامي أحمد سالم على قناة ON في برنامج كلمة أخيرة:"عادل إمام، مفيش فنان زيه، مفيش فنان أخلص لفنه وحبه جمهوره زي عادل إمام، كان مشغولًا بقضايا الوطن وبيقدمها بشكل كوميدي ولطيف ويقدر يضحكنا ويبكينا في نفس الوقت".
استعادة الذكريات 

واستعادت  ذكرياتها مع الزعيم وقالت: “عشرة كبيرة بيني وبينه، أجمل أيام حياتي قضيتها وأنا بشتغل معاه، صحيح أنا بشتغل لحد دلوقتي لكن وهو مش معايا مفيش طعم للشغل زي ما كنت بشتغل معاه، الساحة الفنية مبقاش ليها طعم، مفيش حد نجح 60 سنة، والناس حبته لأنها كانت بتحس أنه واحد منهم".

وأضافت لبلبة: "هو اللي عملني أكون متنوعة في أدواري وكان دايمًا يقولي متعمليش دور شبه دور فاجئي الجمهور.. خليه يدخل يكون فاكر إنك هتعملي كوميدي واعملي تراجيدي، اتعملت منه كتير، وشجعني، وكان بياخد باله من كل صغيرة وكبيرة في شغلنا، وكان بيكون فرحان بالممثل لما يعمل دور حلو ولما أنا اعمل دور حلو يقولي حلو أوي ويشجعني".
 رسالة لبلبة في عيد ميلادها 

وتابعت لبلبة موجهة رسالة لعادل إمام: "يا عظيم يا أعظم فنان وإنسان.. أنت بالنسبة لي حاجة كبيرة أوي ومقدرش أتخيل حياتي وأنت مش فيها، إحنا على تواصل مع بعض بشكل دائم، والحمد لله بكون فرحانة لما هو يضحك ويكون مبسوط لما يكلمني، أسعد لحظات حياته لما كان بيبسط الجمهور، وكل الناس بتحبه".

وأكملت: "فيلم خلي بالك من جيرانك لحد الآن لما بشوفه بضحك، وافتكر الشوط ده اتعمل إزاي، يعمل الشوط بشكل ولو اتعاد يفاجئني بشكل تاني علشان كده، كنت أفضل بصاله علشان ما ادخلش بكلام يضيع حاجة حلوة هيقولها".

واختتمت: "ربنا يسعد أيامه ويخليه لنا.. زعيمنا وببوسه بوسات كتير".