روقا يرد على هجوم عبد الواحد السيد وأيمن عبد العزيز

رد محمد أشرف روقا لاعب الزمالك السابق، على انتقادات أيمن عبد العزيز مدرب الزمالك السابق وأيضًا تصريحات عبد الواحد السيد فيما يخص رحيله عن الزمالك.
وكتب عبر صفحته على إنستجرام: أول مرة أكتب حاجة وأعلق على موضوع أنا قلته أو أرد على حد وأذكره باسمه، وهنا كلامي لكابتن عبد الواحد السيد، حضرتك عارف إني بحبك إزاي وبحترمك إزاي، وده البند اللي في عقدي واللي حضرتك قلت إنه مش موجود أو البند ميخصش الفسخ من طرف واحد.

وأضاف: وحضرتك بتقول المفترض إني شخص متربي، لا هو ده مش مفترض، أنا الحمد لله متربي ومتربي كويس جدًا، ومش مستني حد يقول ده متربي ولا لا، وحضرتك عارف إني مليش في الكدب والتحوير.

وواصل روقا: أما الشخص التاني فهو كابتن أيمن عبد العزيز، حضرتك بتقول إني لما جيت لنادي الزمالك جيت النادي من لا شيء، أنا مش مشكلتي إن حضرتك متعرفش حاجة، أنا قبل ما أجي نادي الزمالك الحمد لله أنا معدي الـ100 ماتش، ربنا كرمني ولعبت منتخب أولمبي مع كابتن حسام البدري، ربنا كرمني روحت منتخب مصر مع كوبر، فأنا الحمد لله مروحتش نادي الزمالك من لا شيء.

واختتم: أما بالنسبة لحوار جوميز فأنا مش محتاج أتحجج، ربنا بس وحده اللي يعلم إذا كنت بكدب أو صادق، فأنت متطلعش تقول أي كلام فارغ عني وأنت متعرفش حاجة، وركز في شغلك بدل ما أنت كل فرقة بتمسكها بتفشل، وبعد كده تمشي.