هيثم أمان: غياب الطب الرياضي في مصر كارثة حقيقية تستوجب التحرك الفوري

أثار المهندس هيثم أمان، الأمين العام المساعد لحزب المؤتمر بالقاهرة، ملف الطب الرياضي ومدى الاهتمام به وتطبيقه في مصر، مؤكدًا أن هذا الملف من القضايا التي تستحق مناقشة جادة ومسؤولة. 

وشدّد على ضرورة التحرك الفعلي لتطبيق القوانين المنظمة لهذا المجال الحيوي، حفاظًا على صحة الرياضيين المصريين الذين يمثلون ثروة وطنية حقيقية.

وقال أمان، في منشور له عبر صفحته الرسمية على موقع "فيسبوك": "تفتكروا كام رياضي في مصر عنده ملف طبي فعلاً؟ الحقيقة إني حاولت أبحث عن إجابة للسؤال ده، ومقدرتش أوصل لرقم محدد، لكن وأنا ببحث اكتشفت إن المادة رقم (79) من قانون الرياضة الصادر سنة 2017 بتلزم كل الأندية والهيئات الرياضية بإعداد سجل طبي لكل رياضي، يتضمن تاريخه الصحي ويتم تحديثه بشكل دوري".

وأضاف: "ورغم إن القانون ده صادر بقاله أكتر من 8 سنين، واتعدل كمان من حوالي سنتين، لكن أقدر أجزم إن فكرة وجود ملفات طبية شاملة للرياضيين في مصر لسه مش جزء من الواقع الرياضي عندنا".

وتابع: "مش هنروح بعيد... لسه من أيام قليلة كان عندنا أزمة في منتخب مصر لتنس الطاولة أثناء مشاركته في أهم بطولة قارية، لما اللاعب الكبير عمر عصر – واحد من أفضل المصنفين عالميًا – اتصاب فجأة أثناء البطولة، وللأسف البعثة مكانش معاها طبيب! وتم حل الموضوع وقتها بالمجاملات، وإن اللاعب يتحامل على نفسه ويلعب".

واستكمل: "إحنا صحيح حققنا ميداليات مهمة في البطولة دي، بس لازم نعترف إن عندنا كارثة حقيقية اسمها الطب الرياضي في مصر".

واختتم أمان قائلًا: "الموضوع ده في غاية الأهمية، ولازم نناقشه من كل الجوانب علشان يكون فيه تنفيذ حقيقي على الأرض، لأن ولادنا الرياضيين دول ثروة وطنية، ولازم نحافظ عليهم".