وليد صلاح الدين: القمة رد عملي على المشككين والأهلي الأقوى في أفريقيا

أكد وليد صلاح الدين مدير الكرة بالنادى الأهلى، أن مباراة القمة بين الاهلى والزمالك كانت مميزة، قائلا:"فيها كورة وتليق بالكرة المصرية، ورد على كل اللى شكك في مستوى قطبى الكرة المصرية".

وقال وليد صلاح الدين، في تصريحات لقناة أون سبورتس: "مبروك للأهلى ومجلسه وجماهيره ولاعبيه، اللاعبين رجالة والظروف صعبة جدا وهارد لك للزمالك وجماهيره ومجلس إدارته".

وأضاف: "المباراة اليوم كانت حلوة وتليق بالكرة المصرية والمباراة كانت ممكن تطلع بأهداف أكثر وده رد على الناس اللى قالت المباراة مش هتكون كويسة بسبب مستوى الاهلى والزمالك ودا أكبر رد".

وتابع: "فريق الأهلى أقوى فريق في أفريقيا بس محتاجين هدوء وهناك أخبار كثيرة تتعدى الـ90% كذب وبضلل الجماهير ده متصدقوش حاجة من الكلام ده والأهلى قافل على الفريق وله منصات للإعلام ترجعوا لها ، وهناك أخبار كاذبة زى زيزو قعد مع وليد وعاوز يلعب وأفشة مش عارف إيه كل ده مالوش صحة".

واستطرد: "الزمالك بدأ أول 10 دقائق كان أفضل وإحنا رجعنا للمباراة وكنا الأحسن ثم الزمالك استحوذ لحد ما جاب الجول وتقدم، بعدها الأهلى سيطر وخد المباراة، والشوط الثانى كله للأهلى والشناوى لم يتعرض لأى هجمة، وهارد لك لعمر كمال في الكرة اللى أهدرها كان هيكون هدف حلو".

وأردف: "لدينا مباراة مهمة بعد 3 أيام ثم التوقف لنعيد ترتيب الأمور مرة أخرى".