طاقم سفينة مصرية يحبط 3 محاولات هجوم قراصنة في عرض البحر
في عرض البحر، وفي رحلة كانت ماشية بشكل طبيعي، طاقم سفينة مصرية اسمها «كايرو لايت» ماكانش متخيل إنهم هيلاقوا نفسهم فجأة في مواجهة مع قراصنة!
كل حاجة بدأت لما قوارب غريبة ظهرت في الأفق، وبدأت تقترب من السفينة بسرعة.. ومع كل لحظة كانت المسافة بتقل، والخطر بيزيد.
لكن المرة دي الموضوع ماكانش مجرد محاولة هجوم واحدة.. دي كانت 3 محاولات خلال 24 ساعة، في خليج عدن بالقرب من مضيق باب المندب، وعلى متن السفينة 21 بحارًا مصريًا بقيادة القبطان علي سليمان.
القراصنة كانوا بيحاولوا يهاجموا السفينة ويستولوا عليها، لكن طاقم «كايرو لايت» ما اتراجعش.
البحارة تحركوا بسرعة، وبدأوا يطلقوا أعيرة نارية تحذيرية علشان يمنعوا القوارب من الاقتراب. والفيديو اللي وثّقه القبطان أظهر اقتراب أحد القوارب المشتبه بها، ولحظات التصدي ليه وإجباره على التراجع.
لحظات صعبة في قلب البحر، محدش عارف المواجهة هتنتهي على إيه.. لكن يقظة الطاقم واحترافيته نجحت في إحباط المحاولات الثلاث ومنع الاستيلاء على السفينة.
والخبر الأهم إن الهجمات انتهت من غير أي إصابات بين أفراد الطاقم الـ21، ومن غير حتى الحاجة لإطلاق نداء استغاثة.
وبعد انتهاء المواجهة، القبطان المصري علي سليمان نشر فيديو يوثق اللحظات دي، ووجّه رسالة شكر لطاقمه، وقال إنه فخور بيهم وبطريقة تعاملهم مع الموقف.
والفيديو انتشر بشكل واسع على مواقع التواصل الاجتماعي، وحصد إشادات كبيرة تقديرًا ليقظة البحارة المصريين وشجاعتهم في مواجهة الخطر.
3 محاولات هجوم خلال 24 ساعة.. و21 بحارًا مصريًا قدروا يحموا سفينتهم في واحد من أهم الممرات البحرية في العالم.
رحلة بحرية تحولت فجأة لمواجهة مع القراصنة.. لكن المرة دي، السفينة المصرية ما كانتش فريسة سهلة!