رئيس مجلس الإدارة
رضا سالم
رئيس التحرير
نصر نعيم

مصر هتسيطر على سوق الغاز.. اتفاق مع أمريكا هيعمل قلبان

سوق الطاقة
سوق الطاقة

تخيل إن عندك ١٠٠ بئر نفط وغاز قافلة وميتة.. وبدل ما تحفر من الصفر.. ترجعها تشتغل تاني بنص التكلفة وربع الوقت؟.. فيا ترى إزاي الذكاء الاصطناعي بقى بيحفر في باطن الأرض؟.. وليه مصر بتجري ورا الآبار القديمة بدل الجديدة؟

مصر اتفقت مع شركة ويذرفورد العالمية على برنامج يرجع حوالي ١٠٠ بئر متوقفة للإنتاج خلال ١٨ شهر.. آبار برية وبحرية في كل أنحاء مصر.. متوقفة لأسباب فنية أو لأنها اتقادمت

والجديد هنا الطريقة.. مش هيجيبوا أجهزة حفر تقليدية ويعملوا دوشة.. التقنيات الحديثة بتعمل تدخلات فنية جوه البئر نفسه.. والذكاء الاصطناعي بيحلل بيانات كل بئر.. ويقول أنهي بئر فيها فرصة حقيقية.. وإيه أنسب تدخل ليها.. فالوقت يقل والتكلفة تنزل

طيب ليه مصر محتاجة الكلام ده دلوقتي؟

الأرقام هتجاوب.. إنتاج مصر من الغاز الطبيعي حوالي ٣.٦٥ مليار قدم مكعب في اليوم.. والاستهلاك؟.. بين ٦.٤ و ٦.٥ مليار.. يعني فجوة بتعدي ٢.٦ مليار قدم مكعب كل يوم.. والفجوة دي بتتغطى بالاستيراد.. يعني دولارات بتخرج بره البلد يوميًا

الاتفاق ده جزء من خطة خمسية لزيادة إنتاج البترول والغاز لحد نهاية السنة المالية ٢٠٢٩/٢٠٣٠.. والفكرة ببساطة إنك تستغل الأصول اللي عندك أصلًا.. بدل ما تصرف مليارات على حفر جديد.. وترجع آبار كانت بتنتج.. فتزود الإنتاج وتقلل فاتورة الاستيراد

ولو البرنامج نجح.. كل قدم مكعب غاز بتنتجه من أرضك.. واحد أقل بتشتريه من بره.. وده يفرق في فاتورة الاستيراد.. وفي الضغط على العملة.. وفي الآخر على خزينة الدولة اللي بتمول كل حاجة في حياتك

تم نسخ الرابط