رئيس مجلس الإدارة
رضا سالم
رئيس التحرير
نصر نعيم

من الطازج للمصنع.. الصادرات الزراعية المصرية تزاحم المنتجات العالمية في أسواق أوروبا

البرتقال المصري
البرتقال المصري

من البرتقال والبطاطس والفراولة لحد الخضروات المجمدة ومركزات العصائر.. المنتجات الزراعية المصرية بتوسع وجودها في الأسواق الأوروبية، وبتنافس منتجات دول العالم بأرقام تصديرية ضخمة

تخيل إن صادرات مصر من الحاصلات الزراعية والمنتجات الغذائية المصنعة لدول الاتحاد الأوروبي بتوصل في المتوسط إلى 3.4 لـ3.8 مليار دولار سنويًا، وفقًا لبيانات الفترة من 2023 إلى 2025، وده بيحط مصر في قائمة أبرز موردي الأغذية الزراعية للأسواق الأوروبية.

واللافت إن الصادرات دي مش مقتصرة على المحاصيل الطازجة بس، لكن كمان المنتجات المصنعة بقت لاعب مهم في المعادلة، وعلى رأسها الفراولة المجمدة والخضروات المجمدة ومركزات العصائر والزيتون المصنع، بجانب النباتات الطبية والعطرية وزيوتها.. وده معناه إن مصر بتتوسع في تصدير المنتج بعد تصنيعه، وبتحقق قيمة مضافة أكبر بدل الاكتفاء ببيع المحصول في صورته الخام.

أما بالنسبة للمحاصيل الطازجة، فمصر بتصدر لأوروبا أكتر من مليون طن سنويًا من الخضروات والفاكهة، وبتتصدر الموالح القائمة بكميات بتتراوح بين 450 و550 ألف طن، تليها البطاطس الطازجة بنحو 350 إلى 450 ألف طن، مع نمو صادرات البطاطا الحلوة والبصل والعنب والفراولة.

وهولندا وإسبانيا وإيطاليا وألمانيا وفرنسا من أهم الأسواق الأوروبية المستقبلة للمنتجات المصرية، وبتلعب الموانئ الهولندية والإسبانية دور مهم في استقبال الشحنات وإعادة توزيعها داخل القارة.

والميزة هنا إن مصر بتستفيد من اتفاقية المشاركة المصرية الأوروبية والإعفاءات الجمركية، إلى جانب قرب المسافة الجغرافية، اللي بيسمح بوصول الشحنات للأسواق الأوروبية خلال 4 إلى 6 أيام عن طريق النقل البحري.

لكن المنافسة مش سهلة، لأن الأسواق الأوروبية بتفرض اشتراطات صارمة على سلامة الغذاء ونسب متبقيات المبيدات، وبتحتاج كمان شهادات صحية نباتية ونظم تتبع تضمن معرفة رحلة المنتج من المزرعة لحد المستهلك.

وعشان كده التوسع في محطات التعبئة والتبريد والتخزين، وتطبيق منظومة التكود الزراعي، بقى ضرورة للحفاظ على جودة الصادرات وزيادة قدرتها على المنافسة.

وبكده مصر مش بتراهن على تصدير المحاصيل الطازجة بس، لكنها بتفتح لنفسها مساحة أكبر في سوق الأغذية المصنعة، علشان كل محصول يقدر يحقق عائد تصديري أكبر ويفتح باب جديد لدخول العملة الصعبة.

تم نسخ الرابط