أكثر من 100 مصنع متعثر في شهر واحد.. مصر تتحرك لإنقاذ المصانع المتوقفة وإعادتها للإنتاج
أكتر من 100 مصنع متعثر في شهر واحد.. ومصر تتحرك لإعادة المصانع المتوقفة للحياة بدل ما تفضل أصولها وخطوط إنتاجها معطلة
وزارة الصناعة أطلقت منظومة جديدة باسم «وحدة دعم المصنع»، وخلال أقل من شهر استقبلت طلبات من أكتر من 100 مصنع محتاجين تدخل علشان يرجعوا للإنتاج من جديد.
لكن المفاجأة مش في عدد المصانع بس.. مصر بتجهز آليات تمويل وإعادة هيكلة بمليارات الجنيهات لإنقاذ الكيانات الصناعية دي.
أولها صندوق لإعادة هيكلة المصانع المتعثرة برأسمال مليار جنيه، بالشراكة بين وزارة الصناعة والبنك المركزي، وبيستهدف ضخ استثمارات في المصانع الواعدة والمساهمة في رؤوس أموالها علشان تقدر تقف على رجليها تاني.
وفيه كمان صندوق تاني بقيمة 10 مليارات جنيه لتشجيع عمليات الاندماج والاستحواذ بين المصانع المتعثرة، وتوفير تمويل للكيانات الجديدة علشان تقدر تشتري معدات وتوفر رأس المال العامل.
أما المصانع اللي مشكلتها فنية أو إدارية، فهتخضع للتقييم وتقديم الدعم اللازم، وفي حالات تانية هيتم ربط المصانع بمستثمرين محليين وأجانب يقدروا يضخوا استثمارات ويعيدوا تشغيلها.
والتحرك ده بييجي ضمن خطة حكومية تستهدف إعادة تشغيل 60% من المصانع اللي بتواجه تعثرات مالية أو فنية خلال 2027 و2028.
يعني بدل ما مصر تبدأ من الصفر وتبني مصانع جديدة، فيه تحرك لاستعادة طاقات إنتاجية موجودة بالفعل، وتشغيل خطوط متوقفة، والحفاظ على فرص العمل، وزيادة الإنتاج المحلي.