رئيس مجلس الإدارة
رضا سالم
رئيس التحرير
نصر نعيم

مترو القاهرة يستقبل قطارات ألستوم الفرنسية.. أولى ثمار صفقة الـ876 مليون يورو تدخل الخدمة

مترو
مترو

قطارت  فرنسية جديدة تدخل مترو القاهرة.. ووراها صفقة بـ876 مليون يورو

شركة ألستوم الفرنسية بدأت التشغيل التجاري لأول قطارين جديدين على الخط الأول لمترو الأنفاق، ضمن صفقة ضخمة مع الحكومة المصرية لتوريد 55 قطارًا جديدًا بقيمة 876 مليون يورو، يعني أكتر من 47 مليار جنيه

والصفقة اللي اتوقعت سنة 2021 مش مجرد شراء قطارات، لكنها كمان بتشمل صيانة الأسطول لمدة 8 سنوات، بهدف تطوير الخط الأول ورفع كفاءة التشغيل.

والأهم إن الخط ده بيخدم حوالي 2.5 مليون راكب يوميًا، وده بيخلي دخول القطارات الجديدة الخدمة خطوة مهمة لتحديث واحد من أكتر خطوط النقل ازدحامًا في القاهرة الكبرى.

القطارات الجديدة من طراز «ميتروبوليس»، واتصنعت في فرنسا بمواصفات متطورة، فيها تكييف هواء، ومساحات مخصصة للسيدات، وتجهيزات لذوي الهمم، وكاميرات مراقبة، وأنظمة معلومات لحظية للركاب.

وكمان تصميمها بيسمح بحركة أسهل بين العربات، ونسبة المكونات القابلة لإعادة التدوير فيها بتوصل لـ98%.

واللافت إن الصفقة ممولة بشكل رئيسي من الخزانة الفرنسية، وبتستهدف تحديث الخط الأول اللي بدأ تشغيله سنة 1987، ويمتد لأكتر من 44 كيلومترًا وبيضم 35 محطة.

يعني أول قطارين دخلوا الخدمة.. لكن وراهم مشروع كامل لتغيير شكل الخط الأول للمترو خلال الفترة الجاية.

تم نسخ الرابط