إشارات راديوية غامضة تصل الأرض بانتظام كل 8 دقائق .. مين بيبعتها!
كل 8 دقائق بالظبط تقريبا، إشارة غامضة بتوصل للأرض من أعماق الفضاء .. والانتظام ده خلى العلماء يسألوا: مين اللي بيبعت الإشارات دي؟
الحكاية بدأت مع رصد نظام نجمي اسمه GPM J071507-114153، بيبعد عن الأرض أكتر من 5 آلاف سنة ضوئية.
والعلماء قدروا يرصدوا منه 214 نبضة راديوية، خلال الفترة من ديسمبر 2024 لحد سبتمبر 2025.
وبعد تحليل الإشارات، اكتشفوا إن مصدرها المحتمل نظام بيتكون من نجم ميت اسمه القزم الأبيض، ونجم تاني شبه الشمس.
والتفسير العلمي بيقول إن دوران القزم الأبيض، والتفاعل بين المجالات المغناطيسية للنجمين، ممكن يكونوا السبب في إنتاج النبضات دي.
لكن الغريب إن انتظام الإشارات فتح باب التساؤلات عن احتمال وجود كائنات فضائية!
العلماء لحد دلوقتي ما لقوش أي دليل على وجود رسالة من مصدر ذكي، وبيفسروا الظاهرة بأسباب طبيعية.
فهل الاكتشاف ده هيساعد العلماء يفكوا ألغاز إشارات فضائية تانية لسه مصدرها مجهول؟

