رئيس مجلس الإدارة
رضا سالم
رئيس التحرير
نصر نعيم

اشتريت شقة ولسه ما استلمتش؟ فلوسك هترجع كاملة!

وحدات سكنية
وحدات سكنية

اشتريت شقة بالتقسيط، ودفعت تحويشة عمرك، وفجأة المطور العقاري اتأخر في التسليم؟ المرة دي ممكن تسترد فلوسك كاملة من غير أي خصومات!

وزارة الإسكان المصرية بتستعد لخطوة جديدة لتنظيم السوق العقاري وحماية حقوق المشترين، من خلال مشروع قانون جديد من المقرر إحالته إلى مجلس النواب خلال شهر.

لكن إيه أبرز التغييرات اللي القانون الجديد ممكن يقدمها؟

أولًا.. إنشاء هيئة مستقلة تتبع وزارة الإسكان، تكون مهمتها مراقبة المطورين العقاريين، ومتابعة الجداول الزمنية للمشروعات، والتأكد من التزام الشركات بوعودها تجاه العملاء.

ثانيًا.. وضع عقد موحد ينظم العلاقة بين المطور العقاري والمشتري، ويضمن حقوق الطرفين.

والأهم هنا إن المشتري هيكون من حقه استرداد أمواله كاملة من غير خصم، في حالة تأخر المطور عن مواعيد التسليم المتفق عليها، أو توقيع غرامات على المطور بسبب التأخير.

لكن المفاجأة مش هنا بس!

الوزارة بتدرس كمان وضع قواعد قانونية لمعالجة مشكلة تعثر المطور العقاري بعد سنوات من سداد العملاء، خصوصًا مع تراجع القيمة الفعلية للأموال اللي دفعوها نتيجة مرور الوقت.

يعني الهدف مش مجرد تنظيم البيع والشراء، لكن كمان وضع رقابة على الشركات وضمان إن فلوس المواطنين وحقوقهم تكون محمية.

فهل القانون الجديد هيكون بداية حقيقية لإنهاء أزمة تأخر تسليم الوحدات العقارية، ولا التنفيذ هو التحدي الأكبر؟

تم نسخ الرابط