174 طنًا من اللمبوكة لمصر.. حصة صيد جديدة تفتح أبواب المكاسب الاقتصادية

 174 طن من سمكة اللمبوكة.. حصة صيد جديدة حصلت عليها مصر، ممكن تفتح باب مكاسب اقتصادية مهمة لقطاع الثروة السمكية والصيادين.

الحكاية بدأت من العاصمة الإيطالية روما، خلال اجتماعات اللجنة العامة لمصايد الأسماك في البحر المتوسط، التابعة لمنظمة الأغذية والزراعة للأمم المتحدة، واللي شاركت فيها 25 دولة.

وهناك نجحت مصر في المفاوضات الخاصة بالانضمام لخطة إدارة مخزون سمكة اللمبوكة، وحصلت على حصة صيد رسمية تبلغ 174 طنًا، بعد استيفاء متطلبات الامتثال وتقديم خطة لتطوير التقييم العلمي للمخزون السمكي.

طيب إيه أهمية الخطوة دي؟

أول مكسب هو إتاحة فرصة منظمة للصيادين المصريين للاستفادة من النوع ده من الأسماك، بدل ما تفضل الموارد البحرية من غير استغلال اقتصادي مدروس.

كمان الحصة الجديدة ممكن تدعم زيادة الإنتاج السمكي، وتفتح مجالات أوسع لتجارة الأسماك وتسويقها وتصنيعها، وبالتالي خلق فرص دخل إضافية للعاملين في القطاع.

والأهم إن الموضوع مش مجرد حصة صيد، لكنه كمان خطوة لتعزيز وجود مصر في إدارة الثروة السمكية بالبحر المتوسط، مع الالتزام بالحفاظ على المخزون وضمان استدامته.

يعني 174 طن مش مجرد رقم.. دي فرصة جديدة لإضافة مورد اقتصادي لقطاع الصيد المصري، والاستفادة من ثروات البحر بشكل منظم ومستدام.