مشروعات بالمليارات على طاولة مصر للألومنيوم.. إيه اللي بيحصل؟

فيه كلام كتير اتقال عن مصنع فويل جديد تابع لشركة مصر للألومنيوم، وإنه هيبدأ التشغيل في منتصف 2029.. لكن الشركة خرجت بتوضيح مهم.

مصر للألومنيوم أكدت أن مشروع إنتاج رقائق الألومنيوم لسه في مرحلة الدراسة، ومفيش تنفيذ بدأ حتى الآن، وده وفق إفصاح رسمي للبورصة المصرية يوم الأحد 1 نوفمبر 2026.

ومش مشروع الفويل لوحده اللي تحت الدراسة، فيه كمان خطط لإعادة تدوير الخبث، وتصنيع أقراص العبوات الدوائية، وإنشاء صومعة لتخزين الألومينا.

اقرأ أيضا

من غير ما تروح الفرع.. طريقة إلغاء محفظتك الإلكترونية أونلاين

لكن الخطة الأكبر بتستهدف زيادة الطاقة الإنتاجية للشركة بنحو 200 ألف طن، ضمن تحركات لتعزيز الإنتاج وتقليل الاعتماد على الاستيراد.

والشركة بتدرس المشروعات دي بهدف رفع كفاءة التشغيل، وخفض التكاليف، وزيادة قدرتها على المنافسة في الأسواق المحلية والعالمية.

وأكدت أنها هتعلن أي تطورات جديدة فور حدوثها، يعني لحد دلوقتي كل المشروعات دي لسه في مرحلة الدراسة، ومفيش مواعيد تنفيذ مؤكدة.