لما جبريل عن انتشار عمليات التجميل: زمان كانت للأغنياء.. ودلوقتي البوتكس والفيلر بالتقسيط

علّقت الإعلامية لما جبريل على الانتشار الكبير لعمليات التجميل بين مختلف الفئات، بعدما كانت في السابق تقتصر على الطبقات الأكثر ثراءً والفنانين.

تصريحات لما جبريل 

وقالت لما جبريل، خلال فقرتها في برنامج الحكاية الذي تقدمه مع الإعلامي عمرو أديب: عمليات التجميل زمان كانت مقفولة على الطبقة الغنية جدًا أو الفنانين اللي الأضواء بتفرض عليهم ده النهارده بقى عمليات التجميل بقت بالتقسيط الفيلر، البوتوكس، ونحت الوسط بقوا على الفيزا.

وأضافت: واضح كده إن السوشيال ميديا مش بس حطت لنا معايير جمال مشوهة ومحفوظة لملامحنا وجسمنا لا دي كمان عملت حالة من عدم الرضا فالناس مستكفتش بالفلاتر اللي بتحطها على كل صورها لأ بقوا يروحوا يعملوا عمليات تجميل بالقسط ونحت في الجسم لحد ما يبقى مقاس الوسط 5 سم.

وأشارت إلى أن عمليات التجميل لم تعد مقتصرة على أصحاب الدخول المرتفعة، قائلة: التجميل انتشر في دواير أوسع بكتير من مجرد ناس معاها فلوس لدرجة أن سوق التجميل والعناية الشخصية عندنا في مصر لوحده وصل لـ2 مليار دولار في 2025 ومصر بتحتل المرتبة الأولى في وجود عدد جراحي التجميل المعتمدين.

ختام تصريحات لما جبريل 

واختتمت حديثها برسالة وجهتها للفتيات، قالت فيها: عاوزة أقول إن كل البنات حلوة بملامحها الطبيعية اللي ربنا خلقها بيها والحاجات التجميلية دي المفروض تكون للضرورة الطبية أو لعيوب واضحة مش موضة بنجري وراها بالديون وأقساط البنوك عشان نطلع شبه بعض في الآخر بصورة كوبي بيست فكري في أولوياتك صح لأن راحتك النفسية وقيمتك مش في كمية الفيلر اللي بتحقنيها ولا في نحت على 12 شهر دون فوايد.

نبذة عن لما جبريل 

يُذكر أن الإعلامية لما جبريل تقدم فقرة متخصصة في التريندات ضمن برنامج الحكاية مع الإعلامي عمرو أديب عبر قناة إم بي سي مصر، وذلك أسبوعيًا يومي الأحد والإثنين، حيث تستعرض أبرز ما يشغل مواقع التواصل الاجتماعي خلال الأسبوع، وكيف يتفاعل معه الجمهور.