أبو تريكة يرد على رسالة حسام حسن.. ويؤكد: «صلاح زي ميسي»

وجه محمد أبو تريكة، نجم الكرة المصرية السابق، رسالة دعم إلى حسام حسن، المدير الفني لمنتخب مصر، قبل انطلاق مواجهة الفراعنة أمام إيران، ضمن منافسات الجولة الثالثة من دور المجموعات لبطولة كأس العالم 2026.

وقال أبو تريكة، خلال الاستوديو التحليلي لقنوات "بي إن سبورتس": "إحنا اتربينا على اسم حسام حسن كلاعب، وعنده لحظات تاريخية في الكرة المصرية، وأبرزها هدف صعود مصر لكأس العالم 1990. أنا بشكره على الرسالة اللي بيوصلها، ودي رسالة أي مشجع مصري لمدرب منتخب بلده."

وأضاف: "أنا نفسي حسام حسن ينجح، لأن نجاحه هو نجاحنا كلنا، وهيفتح الباب قدام لاعيبة كورة كتير تكمل في مجال التدريب. هو بياخد بالأسباب، وكمان وجود الكابتن إبراهيم حسن معاه عامل حالة كويسة جدًا داخل المعسكر."

أبو تريكة يدافع عن حسام حسن
 

وتابع: "في ناس بتربط وجود إبراهيم حسن بأنه موجود عشان أخوه، لكن أنا عارف الأجواء داخل المنتخب، وهو عامل شغل كبير في تهيئة اللاعبين وتوفير مناخ مناسب للفريق، وبتمنى ليهم الاستمرار والنجاح."

واستكمل: "أنا أتمنى المستوى والروح اللي شفناها تستمر، والمنتخب يلعب دايمًا على الفوز، بلاش نفكر في الحسابات أو هنقابل مين بعد كده، المهم نكسب الأول، وبعدها لكل حادث حديث."

واختتم أبو تريكة حديثه: "الأهم إن حسام حسن عرف يستغل محمد صلاح كويس، وزي ما منتخب الأرجنتين كله بيلعب عشان ميسي، لاعيبة مصر كمان بتحب صلاح وعايزة تنجحه، وده بيظهر في الروح اللي الفريق بيلعب بيها."