ابنة الفنان محمد مرزبان: قلبي وجعني أوي على فراقك.. حلمت بيك واطمنت أنك بخير

عبرت ابنة الفنان محمد مرزبان عن حزنها الشديد على فراق والدها، وذلك بعد أسبوع من وفاته إثر حادث سير مروع، مؤكدة أن صدمة رحيله ما زالت تلازمها، وناشدت محبيه الدعاء له بالرحمة والمغفرة.

منشور ابنة الفنان محمد مرزبان 

وكتبت ابنة الفنان محمد مرزبان، عبر حسابها على موقع فيسبوك: يا بابا عدى أسبوع من ساعة ما مشيت، ولسه مش قادرة أصدق إن دي الحقيقة، لسه مستنياك تدخل من الباب أو أسمع صوتك بتناديني، مش قادرة أستوعب إني مش هشوفك تاني ولا هسمع صوتك إلا في الصور وvoice notes اللي بقيت بسمعها كل يوم واسمع نصايحك ليا و"صباح الفل يا شهودة" عشان أصبّر نفسي.

وأضافت ابنة الفنان محمد مرزبان: كل يوم بصحى من النوم بتمنى إنه يكون كابوس وإن مفيش حاجة حصلت وأشوفك تاني، كان نفسي تقوم بالسلامة وتشوف حب الناس من اللي تعرفك واللي متعرفكش، وكان نفسي تسمع الكلام الحلو اللي بيتقال عليك من كل الناس، والناس اللي وقفت جنبنا ومعانا وبتعمل ده من حبها فيك، وقد إيه سيرتك طيبة وحلوة إحنا عشنا ولسه وهنفضل عايشين متشرفين إنك أبونا.

وتابعت ابنة الفنان محمد مرزبان: كان نفسي في حاجات كتير أوي لسه نعملها مع بعض، خروجات، وسفريات، وقعدة البيت ناكل على سفرة واحدة، وحسن وحمزة يصدعوك من كتر الكلام، وفطار يوم الجمعة بعد الصلاة، قعدتنا نتفرج على فيلم ونتجمع نتفرج على ماتش وحاجات كتير أوي.

ختام حديث ابنة الفنان محمد مرزبان 

واختتمت ابنة الفنان محمد مرزبان حديثها قائلة: مشيت وسيبت فراغ كبير أوي قلبي واجعني يا بابا، بس أنا حلمت بيك واطمنت أنك بخير وفي مكان أحلى بكتير، وربنا بعتلنا علامات كتير تطمّنا عليك يا حبيبي، كان نفسي أقولك كل يوم إني بحبك، كان نفسي أحضنك وأبوسك كل يوم، كان نفسي أقولك كل يوم إنك أعظم أب في الدنيا، بس انا هفضل كل يوم أدعيلك وأحاول أكون نسخة تانية منك وأعمل الحاجات الحلوة والخير اللي كنت بتعملها، وأربي عيالي أنهم يبقي شبهك وزيك.. بحبك أوي يا حبيبي يا روح قلبي، وإن شاء الله نتقابل في الجنة.. الله يرحمك يا حبيبي.