«بصورة من سلسال الدم».. رانيا فريد شوقي تستعيد ذكرياتها مع عبلة كامل

استعادت الفنانة رانيا فريد شوقي ذكرياتها مع الفنانة عبلة كامل من خلال منشور مؤثر نشرته عبر حسابها على موقع التواصل الاجتماعي فيسبوك، متحدثة من خلاله عن كواليس عملهم سوياً في مسلسل سلسال الدم.

رانيا فريد شوقي تستعيد ذكرياتها مع عبلة كامل 

وكتبت رانيا فريد شوقي عبر حسابها بموقع فيسبوك: "بوست في حب الجميلة المبدعة عبلة كامل.. ​أنا كنت محظوظة بجد إني اشتغلت معاها من بداياتي واشتغلنا حوالي 4 مسلسلات ومسرحية اسمها آدم وحوا وآخر مسلسل  "سلسال الدم".

وأضافت رانيا فريد شوقي: "من ذكرياتي معاها في مسلسل "حد السكين" (رمضان ٢٠٠٣)، تأليف الكاتب محمد الغيطي وإخراج محمد النقلي و انتاج ناهد فريد شوقي كنت طالعة أختها الشريرة "شهيرة قلب الأسد"، وهي كانت "فريدة" الطيبة الغلبانة. ​وعلى فكرة، "فريدة" ده كان اسم بنتي البكرية، فكنت بفتري على "فريدة" في التصوير وأرجع أحضن "فريدة" في البيت".

وتابعت: "الحقيقة اللي كنت بداريها ورا الكاميرا إن عبلة كامل كانت بتمثل الانكسار بصدق يوجع القلب، لدرجة إني كنت ببقى عايزة أوقف المشهد وأحضنها من كتر ما بتصعب عليا، بس كان لازم أسيطر على مشاعري عشان "شهيرة" تطلع "مفترية" و​الحمد لله المسلسل نجح جداً، والناس كانت تقابلني في الشارع تقولي: " شهيرة قلب الأسد.. حرام عليكي أختك فريدة إيه كل الشر ده!".

وأردفت رانيا فريد شوقي: "​الشغل معاها متعة تانية خالص، وفي الكواليس شربات وقربنا من بعض أكتر في المسرحية وأطلقت عليا لقب "المحلقة"! وفضلت فاكراه لدرجة إننا لما اتقابلنا في "سلسال الدم" بعد سنين، أول ما شافتني قالتلي بضحكتها القمر“ المحلقة ​أجمل أيام بجد.. يا رب ترجع تنور الشاشة وتمتعنا كالعادة وحشتينا يا ست الستات أحلى مفاجأة وطلة علينا في رمضان بحبك اوي.. ربنا يشفيكي ويعافيكي ويطمنا عليكي دايمًا يارب".