محمد صلاح: لقائي مع مجدي يعقوب شرف كبير.. وكان نفسي أطلع زي حسن شحاتة ومحمود الخطيب

أعرب محمد صلاح، قائد منتخب مصر ونجم ليفربول الإنجليزي، عن سعادته الكبيرة بلقاء جراح القلب العالمي السير مجدي يعقوب، مؤكدًا أنه سيظل يفتخر بهذه اللحظة طوال حياته، قائلا: «مبسوط جدًا إني قاعد معاك، وهفضل أفتخر باللحظة دي طول عمري».

وتحدث نجم ليفربول عن بداياته في مسقط رأسه، قائلاً: «كان هدفي وأنا صغير إني ألعب كرة شراب في القرية اللي اتولدت فيها، وكنت بلعب مع أصحابي من غير ما يفرق معايا ألعب فين. وبعد ما طلعت الفريق الأول، بدأ حلمي أسافر أوروبا، ولما وصلت هناك قلت لازم أعمل حاجة محدش عملها في مصر علشان أرفع طموحات كل اللي هييجوا بعدي».

وأشار صلاح إلى أنه كان يتمنى أن يصبح مثل العديد من نجوم الكرة المصرية، قائلاً: «كان نفسي أطلع زي حسن شحاتة ومحمود الخطيب، هما كانوا الأبرز في مصر وقتها، لكن الشخص الوحيد اللي كان مؤمن بيا فعلًا هو والدي».

وكشف صلاح عن دور والده في دعمه المستمر: «والدي كان بيصرف فلوس ومش عارف هل هنجح ولا لأ، ووالدتي كانت بتخاف عليّا.. لكن والدي كان مصدق فيا وورايا في كل مكان، ومقدرش أنكر فضله.. هو ضحّى كتير علشان ألعب كرة، وأنا مدين له بكل اللي وصلت له».