محمد سامي: مي عمر نجحت بتعبها.. والهجوم عليها بسبب علاقتها بيا

أكد المخرج محمد سامي أنه يهتم دائمًا بآراء الجمهور أكثر من النقاد، قائلاً: "بالنسبة للنقاد، فيه ناس فاهمة نقد فعلًا، لكن فيه ناس تانية بتمتهن النقد دون دراية، وفيه كمان اللي بيعملوا فيديوهات على السوشيال ميديا ويدّعوا إنهم نقاد، والفئة دي أنا مش مهتم برأيها خالص."

وخلال لقائه ببرنامج "الصورة" الذي تقدمه الإعلامية لميس الحديدي على قناة النهار، كشف سامي عن أكثر الانتقادات التي تسببت له في وجع نفسي، موضحًا: "اللي بيضايقني فعلًا إن لما أقدّم عمل ناجح، ألاقي بعض الناس تسيب العمل وتتكلم عن عيلتي أكتر حاجة وجعتني لما شفت نقد موجه لأختي الصغيرة بعد دورها في مسلسل (البرنس)، رغم إنها قدمت دور مهم جدًا."

وعن اتهامه بتشغيل أفراد عائلته، قالت لميس الحديدي: "هل فعلاً بتشغّل العيلة؟ ومي عمر صحيح اشتغلت قبلك، لكنها زادت نجوميتها معاك؟"

فأجاب سامي: "خليني أقول حاجة يمكن تكون قاسية شوية... لو مي عمر مش مراتي، وكان في بينا علاقة من غير جواز، محدش كان هيتكلم، بالعكس ده ممكن كان يبقى موضوع تاني خالص، لكن عشان إحنا متجوزين الناس بتهاجمنا.. وبالمناسبة أنا طلعت ناس كتير غير مي عمر."

وتحدث سامي عن مشوار زوجته الفني قائلاً: "مي اشتغلت في مسلسلات كتير بعيد عني، زي (الأسطورة) و(عوالم خفية) مع عادل إمام، وكل نجاحها من تعبها ومجهودها مش عشانها مراتي."

وأضاف: "بعض الهجوم اللي بتتعرض له سببه علاقتها بيا مش أعمالها، ولو كانت مجرد فنانة مش مرتبطة بيا محدش كان هيتكلم عنها بالشكل ده، لكن دي ضريبة الأضواء."