أسبونتا وزلدا وصبابا.. 3 أصناف تقاوي تقود استعدادات مصر لموسم البطاطس الجديد
موسم البطاطس الجديد في مصر بدأ يستعد بقوة.. وشحنات تقاوي مستوردة من هولندا وصلت بالفعل، ومعاها أصناف مختلفة أبرزها أسبونتا وزلدا وصبابا، استعدادًا لموسم الزراعة 2026/2027.
اتحاد منتجي ومصدري الحاصلات البستانية بدأ استقبال الشحنات بمحطة الاتحاد في منطقة أبيس، تمهيدًا لفحص التقاوي وتجهيزها وتوزيعها على المزارعين، علشان تكون متاحة في مواعيد الزراعة المناسبة.
واللافت إن أسعار التقاوي بتختلف حسب الصنف.. الشيكارة وزن 50 كيلو من صنف زلدا سجلت 2425 جنيهًا، وأسبونتا بـ3300 جنيه، بينما صبابا وصل سعرها إلى 3310 جنيهات.
والتحرك ده مهم لأن البطاطس مش مجرد محصول للاستهلاك المحلي، لكنها كمان واحدة من أهم المحاصيل التصديرية المصرية، وصادراتها وصلت خلال 2025 إلى نحو مليون و300 ألف طن، بقيمة حوالي 537 مليون دولار.
وتوفير التقاوي الجيدة في الوقت المناسب بيمثل خطوة أساسية لتحسين إنتاجية المحصول وجودته، وتلبية احتياجات السوق المحلية ومصانع التصنيع الغذائي، وكمان الحفاظ على مكانة البطاطس المصرية في الأسواق العالمية.

