100 جنيه زيادة عن السعر العادل للجرام.. تلاعب في أسعار الدهب في مصر
الذهب في مصر بيواصل الهبوط.. لكن هل الأسعار الحالية بقت فرصة حقيقية للشراء؟ وليه المواطن لسه بيدفع في الجرام أكتر من قيمته العادلة بحوالي 98 جنيه؟ وهل انخفاض السعر معناه إن الوقت مناسب ندخل السوق ونشتري؟
أسعار الذهب في مصر سجلت تراجع جديد خلال تعاملات النهارده الاثنين.. متأثرة بموجة الهبوط اللي بتضرب الأسواق العالمية بسبب بيانات التضخم الأمريكية اللي جت أعلى من توقعات الأسواق.
وبحسب بيانات منصة آي صاغة.. جرام الذهب عيار 21 نزل لـ5940 جنيه بعد ما خسر 25 جنيه.. وعيار 24 سجل حوالي 6788 جنيه.. وعيار 18 وصل لـ5091 جنيه.. أما الجنيه الذهب فسجل 47 ألف و520 جنيه.
لكن المفاجأة مش في التراجع نفسه.. المفاجأة إن الذهب رغم انخفاضه لسه أغلى من قيمته النظرية في السوق المصري!
إزاي الكلام ده؟
سعر الجرام عيار 21 المفروض وفق سعر الأونصة العالمي وسعر الدولار يبقى حوالي 5842 جنيه.. لكن السعر المتداول في مصر وصل لـ5940 جنيه.. يعني فيه فارق حوالي 98 جنيه في كل جرام بيتحمله المشتري.
والسبب إن الأونصة العالمية نفسها بتتعرض لضغوط قوية.. ووصلت لمستويات قرب 3850 دولار.. وهو أدنى مستوى ليها خلال 52 أسبوع.. مع قوة الدولار الأمريكي وزيادة التوقعات باستمرار الفيدرالي في سياسة الفائدة المرتفعة.
والنقطة الأهم هنا إن مجرد نزول الذهب مش معناه إن السعر بقى عادل.. لأن الحكم الحقيقي على فرصة الشراء مرتبط كمان بالفجوة بين السعر المحلي والقيمة النظرية.
يعني اللي بيفكر يشتري دهب محتاج يبص مش بس على سعر الجرام نزل كام.. لكن كمان على حجم الزيادة اللي لسه موجودة فوق قيمته العادلة.

