الجنيه هيروح في حتة تانية خالص.. سر عودة استثمارات الأجانب إلى أدوات الدين المصرية

أكتر من 2 مليار دولار دخلوا مصر في 4 أيام.. هل رجوع الأموال الساخنة هو السبب في تراجع الدولار؟ وليه المستثمرين الأجانب بيضخوا المبالغ الضخمة دي في الدين الحكومي المصري رغم إن الدولار لسه فوق 53 جنيه؟.

السوق المصرية شهدت تحرك قوي من المستثمرين العرب والأجانب.. اللي ضخوا مئات الملايين من الدولارات في أدوات الدين الحكومي خلال تعاملات الأسبوع الحالي..

والنهارده الخميس لوحده سجلوا صافي شراء بقيمة 342.9 مليون دولار في السوق الثانوية لأذون وسندات الخزانة..

وبكده إجمالي صافي مشترياتهم خلال 4 أيام تجاوز 2 مليار دولار..

والأرقام بتكشف حجم التدفقات دي بشكل أوضح.. يوم الاثنين سجلوا مشتريات بـ614.6 مليون دولار.. والثلاثاء الرقم قفز لـ996 مليون دولار.. والأربعاء سجل 50.7 مليون دولار.. والخميس أضافوا 342.9 مليون دولار جديدة..

والتدفقات دي بتعني إن المستثمرين الأجانب والعرب بيزودوا استثماراتهم في أدوات الدين المصرية.. وده بيوفر طلب على الجنيه ويدعم توافر العملة الأجنبية في السوق..

والتحرك ده جه بالتزامن مع تراجع الدولار قدام الجنيه خلال تعاملات النهارده الخميس.. بعد ارتفاع مؤقت حصل امبارح الأربعاء..

لكن رغم التراجع.. الدولار لسه محافظ على مستواه فوق 53 جنيه في كل البنوك المصرية..

وسجل أعلى سعر في بنك أبوظبي الإسلامي عند 53.52 جنيه للشراء و53.62 جنيه للبيع..

بينما أقل سعر ظهر في بنك أبوظبي الأول وكريدي أغريكول عند 53.34 جنيه للشراء و53.44 جنيه للبيع..

أما البنك المركزي المصري فسجل الدولار عند 53.37 جنيه للشراء و53.50 جنيه للبيع..

والرسالة الأهم إن عودة التدفقات الأجنبية بأحجام كبيرة بتوفر دعم لسوق الصرف والجنيه.. لكن استمرار التأثير ده مرتبط باستمرار دخول الاستثمارات وقدرتها على البقاء في السوق.. خصوصا إن الأموال الساخنة ممكن تتحرك بسرعة مع تغير العوائد والظروف الاقتصادية.