حقيقة انتشار الفيروسات التنفسية في مصر.. وهل ظهر فيروس جديد بين الأطفال؟ الريل:

هل مصر بتواجه فيروس جديد؟ وليه حالات البرد والكحة والسخونية زادت بين الأطفال الفترة الأخيرة؟ وهل اللي بيحصل ده مجرد انتشار موسمي ولا فيه حاجة تستدعي القلق؟

الدكتور محمد عوض تاج الدين، مستشار رئيس الجمهورية للشؤون الصحية، حسم الجدل، وأكد إن انتشار الفيروسات التنفسية في الفترة دي مرتبط بتقلبات الجو والانتقال بين الفصول، خصوصًا مع رجوع الأطفال للمدارس وزيادة التجمعات.

وأوضح إن فيه أنواع مختلفة من الفيروسات المنتشرة، وأعراضها متشابهة، لكن دي فيروسات معروفة وبتتكرر كل سنة، ومش معناها ظهور فيروس جديد.

ووزارة الصحة أكدت كمان إن الإصابات التنفسية بين الأطفال ضمن المعدلات الموسمية المعتادة، ومفيش أنماط غير طبيعية أو تفشيات استثنائية مرصودة في المدارس والحضانات.

لكن التحذير الأهم كان من التعامل مع الأعراض بشكل عشوائي، خصوصًا استخدام المضادات الحيوية أو أدوية من غير استشارة طبيب، لأن مش كل عدوى فيروسية محتاجة نفس العلاج.

ومن بين الفيروسات اللي بتنشر في الموسم ده الفيروس التنفسي المخلوي، واللي ممكن يسبب مضاعفات خطيرة عند الرضع وصغار السن.

يعني السؤال مش بس: هل ظهر فيروس جديد؟ لكن كمان: إزاي نحمي أطفالنا من الفيروسات المنتشرة؟